Б.Отгонхүү: Д.Монголхүүд зааварчилгаа өгсөн эзэн нь С.Эрдэнэ юм

Өнгөрсөн гуравдугаар сарын 7-нд Монголын ардчилсан холбооны /МоАХ/ Их хурал болж өнгөрсөн. Уг хурлаар Д.Монголхүүг тэргүүнээр сонгож, Х.Баттулгыг огцруулсан гэдгээ мэдэгдэж байгаа. Гэвч уг хурал нь хүчин төгөлдөр мөн эсэх, МоАХ-ны тамга тэмдэг Д.Монголхүүд байгаа эсэх талаар МоАХ-ны Бодлого үйл ажиллагааны хэлтсийн дарга Б.Отгонхүүгээс тодрууллаа.  

 

Тэрбээр "Гуравдугаар сарын 7-нд болсон хурлыг хурал гэхэд хэцүү. Д.Монголхүү нар өөрсдийгөө тавдугаар их хурал хийж байна гэж сайн дураараа хурал хийлээ. Өнөөдөр хэсэг бүлэг залуус талбай дээр гарч ирж гоё юм яриад, ард нь улстөрчид санхүүжүүлдэг технологитой болсон. Өмнө нь хоёрдугаар сарын 18-нд МоАХ--ны зөвлөгөөн нэртэй хурал хийсэн. Энэ бүхний ард АН-ыг хагалсан С.Эрдэнэ гэдэг хүн байгаа. Энэ хүн бол СТӨ-ний түрээсийг төлж, Д.Монголхүүд зааварчилгаа өгсөн. Зааланд нь хүн байхгүй, таван хүн сууж байгаад Их хурал хийсэн. Бидний зүгээс Д.Монголхүүтэй холбоотой асуудлаар цагдаад хандсан. Цагдаа зөрчлийн шинжтэй байна гэдгийг тогтоосон. Прокурорт шилжсэн байх. МоАХ 2021 оноос гишүүдийнхээ шинэчилсэн бүртгэлийг хийж эхэлсэн. Энэ бүртгэлд бол Д.Монголхүү нар ороогүй" гэлээ.