Г.Амартүвшин гишүүний олгосон 33 тэрбумын зээл АТГ-т очлоо

Улс, эх орны эдийн засгийг хөгжүүлэх зорилготой, өөрийн гэсэн бие даасан хуультай Хөгжлийн банк үүргээ гүйцэтгэх чадамжгүй болж, эсрэгээрээ "хөгжилд тушаа" болж байсныг саяхан олон нийт анзаарч, тэр хэрээр нийгмийн том сэдэв, шүүмжлэлийн бай болоод байгаа билээ.

Учир нь, улс төрд нөлөө бүхий нөхөд өөрсдийн хамаарал бүхий компаниараа дамжуулж, Хөгжлийн банкнаас их хэмжээний зээл авсан, авсан зээлээ зориулалтын бусаар ашигласан, эргэн төлөөгүй нь илчлэгдсэн.

Тэгвэл УИХ-ын гишүүн Г.Амартүвшин Хөгжлийн банкны захирлаар ажиллаж байхдаа Г.Дамдинням, Х.Ганхуяг нарын хамаарал бүхий компанид 33 тэрбум төгрөгийн зээл олгосон гэх хэрэг АТГ-т очлоо.

Энэхүү мэдээллийг УИХ-ын даргын захирамжаар байгуулсан Хөгжлийн банканд хяналт, шалгалт хийх Ажлын хэсгийн ахлагч Б.Баттөмөр өнөөдөр /2022.03.29/ хэвлэлийнхэнд дайлаа. Өөрөөр хэлбэл, Ажлын хэсгийн зүгээс Хөгжлийн банктай нэр холбогдсон, зээл авсан улс төрд нөлөө бүхий 20 хүнийг АТГ-т шалгуулахаар өгч байгаа аж. 

Хэдийгээр УИХ-ын гишүүн Г.Амартүвшингийн Хөгжлийн банкны захирлаар ажиллаж байхдаа Г.Дамдинням, Х.Ганхуяг нарт 33 тэрбум төгрөгийн зээл олгосон явцыг цэвэр бизнесийн зээл гэж тайлбарладаг ч эсрэгээрээ энэ бол цэвэр "хулгай, дээрэм" гэдэг нь хэнд ч ойлгомжтой, тодорхой юм.

Харин өнөөдрийг хүртэл эрх мэдэл, албан тушаалын байдлаа ашиглаж журмын нөхдөдөө бүхэл бүтэн 33 тэрбум төгрөгийн зээл олгосон явдалд хариуцлага тооцохгүй, хариуцлага ярихгүй байгаад олон нийт бухимдалтай байна.

Ямартай ч Хөгжлийн банкны захирлаар ажиллаж байхдаа эрх мэдэл, албан тушаалаа ашиглаж бусдад давуу эрх олгож 33 тэрбум төгрөгийн зээл олгосон гэх Г.Амартүвшин гишүүний хэргийг хууль, хяналтын байгууллага анхааралдаа авч, шалгахаар боллоо.