А.Адъяасүрэн: Бид АН-ын даргаа захиалгаар биш ӨӨРСДӨӨ СОНГОХ ёстой

Улсын Дээд шүүхээс С.Эрдэнийн талын АН-ын дүрмийн өөрчлөлтийг албан ёсоор бүртгэсэн ч О.Цогтгэрэлийн талын АН-ын даргыг сонгох сонгуулийн санал хураалт өнөөдөр /2022.04.03/ 20:00 цаг хүртэл үргэлжилнэ. Хэдийгээр нэр дэвшигч Ж.Батсуурь нэрээ татсан ч санал хураалтын үйл ажиллагаа хэвийн үргэлжилж байгаа юм. 

Тэгвэл дөнгөж сая УИХ-ын гишүүн А.Адъяасүрэн санал өгөх байранд очиж саналаа өглөө.

Тэрбээр энэ үеэрээ "Үндсэн дүрмийнхээ хүрээнд, АН-ын гишүүнийхээ хувьд намын даргыг сонгох сонгуульд саналаа өглөө. Манай намын онцлог бол гишүүн төвтэй. Гишүүд хаана байна, бид тэнд байх ёстой. Иргэд тэгш боломж, шударга ёсыг хүсэж байна. Төрд байх иргэдийн хяналтыг бас хүсэж байна. Дан ганц улс орныг удирдаж байгааг бүгд мэдэж байгаа шүү дээ. Харин Улсын Дээд шүүх дээр АН-ын даргын ямар нэгэн шийдвэр гараагүй, байхгүй. Өнөөдөр бид АН-ын даргаа өөрсдөө сонгох ёстой. Түүнээс ямар нэгэн улс төрийн хүчин, хэсэг бүлэг хүмүүсийн захиалгаар намынхаа даргын сонгохгүй. Үндэсний хэмжээний намын хүрээнд гишүүд өөрсдөө даргаа сонгох ёстой. Энэ бол зөвхөн намын асуудал" гэв. 

Түүнчлэн "Бүлэг дээр ямар нэгэн ярилцсан зүйл байхгүй. Гэхдээ хувь хүний үзэл бодлыг хүндэтгэнэ. Гэвч Ж.Батсуурь гишүүнийг болчимгүй үйлдэл хийчихлээ гэж харж байна, миний хувьд. Учир нь, АН-ын сонгогчдод Ж.Батсуурь гишүүнийг дэмжих хэсэг байсан байх гэж бодож байна. Үнэхээр залуу хүний хувьд, УИХ-ын гишүүнийхээ хувьд 21 аймгаа тойроод л үгээ хэлээд явсан шүү дээ. Тэр иргэд, сонгогчдынхоо итгэл, найдварыг бадрааж ажлаа явуулах байсан байх л гэж бодож байна даа" хэмээн байр сууриа илэрхийллээ.