Монгол орны 519 шувууны талаар судалсан "BIRDS OF MONGOLIA" хоёр боть ном гарлаа

Б.Түшиг | Zindaa.mn
2022 оны 04 сарын 09

МУИС-ийн багш, доктор, профессор шувуу судлаач С.Гомбобаатарын Монгол орны шувуу судлал, хамгааллын чиглэлээр гүйцэтгэсэн ажлын үр дүнг нэгтгэн гаргаж буй “Монгол орны шувуу” 2 боть бүтээл болон “Bubo” аппликейшний нээлтийн үйл ажиллагаа боллоо.

Монгол оронд албан ёсоор тэмдэглэгдсэн 519 зүйлийн шувуу тус бүрийг нарийвчлан судалж хийсэн энэхүү бүтээл нь англи хэл дээр гарсан бөгөөд 2023 онд Монгол хэл дээр хэвлэгдэх аж. 

Номонд шувууны шинжлэх ухааны болон гадаад нэршил, ангилал зүй, тархалт, амьдрах орчин, үржил, идэш тэжээл, нүүдэл болон хамгаалах арга хэмжээ гэх мэт олон талын судалгааг багтаасан байна. 

Номын зохиолч МУИС-ийн багш, доктор, профессор шувуу судлаач С.Гомбобаатар бүтээлийнхээ талаар "Энэ бүтээлд багтсан нийт 3000 орчим гэрэл зургуудыг бусад бүтээлээс ялгаатай байлгах, зүйлийн шинжийг сайн тогтоолгох зорилгоор зураг бүрийн арын дэвсгэрийг нэг бүрчлэн арилгаж хийлээ. Ер нь би гэрэл зураг авахдаа шувууны агшин, сайхан харагдах гэхээсээ илүүтэй сууж, нисэж буй шувуу бүрийн тодорхойлох шинжийг авах, гаргахыг хичээдэг. Мөн нас, хүйсийн онцлогийг нь илэрхийлэх шинжийг үргэлж санаж, тунгааж авдаг. 

Ер нь зураг авах болгондоо шувуу бүрийн шинжийг санаж, бодож гэрэл зэргийг нь буулгана гэдэг бол “мэргэжлийн солиорол” гэж үзэх талтай. Ийм солиотой байж гэрэл зургийг системтэй цуглуулна. Харагдсан бүхнээ дараад хажуугаар өнгөрч буй “алтыг” буюу өөрт байхгүй зүйлийн зургийг авч чадахгүй өнгөрөөвөл маш харамсалтай" хэмээн номонд оруулсан зургийн талаар онцолж байлаа.  

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top