МАН-д ч, АН-д ч тэр Н.Алтанхуягийг "явуулах" сонирхол бий!

УИХ-ын гишүүн Н.Алтанхуягийг суудлаас нь буулгаж, бүрэн эрхийг нь түдгэлзүүлэх эсэх нь цаг хугацааны асуудал болоод байна. Өөрөөр хэлбэл, төрийн эрхийг барьж байгаа МАН-д ч тэр, тэднийг сөрж байгаа АН -д ч тэр Н.Алтанхуягийг "парламентаас хөөх" сонирхол бий.

Учир нь, Н.Алтанхуяг УИХ-ын 2020 оны ээлжит сонгуульд бие дааж нэр дэвшин сонгогдсон ч "замын дунд"-аас АН-даа буцаж очсон. 

Тэр хоёр хуваагдсан намынхаа О.Цогтгэрэл даргатай АН-ыг сонгож, С.Эрдэнийн эсрэг зогссон билээ. Харин УИХ дахь АН-ын бүлгийг Д.Ганбат зангидаж, түүний ард С.Эрдэнэ бий.

Нэг үгээр Н.Алтанхуягийн бүрэн эрхийг түдгэлзүүлэх "кноп"-ыг МАН-аас сонгогдсон гишүүдээс гадна С.Эрдэнийн талын гэх тодотголтой намынх нь С.Одонтуяа, Д.Ганбат, Ш.Адьшаа, Д.Ганибал,  Ж.Батсуурь нарын гишүүд хүч нэмж, Н.Алтанхуягийн эсрэг дарах магадлал өндөр. 

Хэдийгээр УИХ-ын гишүүн Н.Алтанхуяг өөрийгөө Хөгжлийн банкны хэрэгт хамааралгүй, нөлөөлсөн зүйл байхгүй гэж мэдэгддэг ч хууль хяналтын байгууллагаас түүнийг яллагдагчаар татчихлаа. Түүгээр ч зогсохгүй, бүрэн эрхийг нь түдгэлзүүлж шалгах хүсэлтэй байгаагаа Улсын Ерөнхий прокурор Б.Жаргалсайхан өчигдөр /2022.04.25/ УИХ-ын дарга Г.Занданшатарт хүргүүлэв.

Ингэхдээ Н.Алтанхуягтай хамт МАН-ын гурван гишүүн болох Х.Ганхуяг, Ё.Баатарбилэг, Г.Амартүвшин нарын нэрийг орууллаа. 

Энд УИХ-ын гишүүн Н.Алтанхуягаас ялгаатай нь Х.Ганхуяг, Ё.Баатарбилэг, Г.Амартүвшин нар намын дэмжлэгтэй, нам нь төрийн эрхийг барьж байгаа явдал юм. Өөрөөр хэлбэл, мань гурав гишүүдийнхээ дэмжлэгтэйгээр УИХ-ын гишүүнийхээ бүрэн эрхтэй үлдэх "боломжтой".

Харин УИХ-ын гишүүн Н.Алтанхуяг эсрэгээрэй, бүр намын дэмжлэг ч байхгүй. Эндээс харахад, Н.Алтанхуягийн УИХ-ын гишүүн байх хугацаа, бүрэн эрхийг нь түдгэлзүүлэх эсэх нь цаг хугацааны л асуудал болжээ. Нөгөө талаараа эрх баригч намынхан зөвхөн Н.Алтанхуягийг явуулахын тулд гурван гишүүнээрээ "туг тахиж" байгааг ч үгүйсгэхгүй билээ.