Буриадад монгол жуулчдад зориулан, хаягаа буриадаар бичнэ

Буриадын нийслэл Улаан-Үд хотын захиргаанаас Буриад хэл хариуцсан тусгай комисс байгуулах боллоо.

Хотын орлогч дарга, Залуучууд, нийгмийн байнгын хорооны тэргүүн Светлана Трифонова “Одоогийн байдлаар Улаан-Үд хотод нийт буриадуудын 31,88 хувь нь амьдарч байна. Харамсалтай нь судалгаагаар тэдний ихэнх нь төрөлх буриад хэлээ мэдэхгүй байна. Тиймээс буриад хэлээ хамгаалах, хөгжүүлэх тусгай комисс байгуулна. Хотын захиргаа, дүүрэг, хороонд буриад хэл мэддэг 1-2 ажилтан заавал ажиллуулж байгаа. Хүсвэл буриад хэл дээр өргөдөл, хүсэлт гаргаж болно. Гудамж талбайн нэрийг буриад хэл дээр бичиж, хадах гээд хийх ажил их байна” гэж сэтгүүлчдэд мэдээллээ.

Мөн буриад хэлээ хамгаалах том ажил нь нийтийн тээврийн хэрэгслүүд зогсох буудлуудын нэрийг буриад хэл дээр зарлаж байх, ресторан хоолны газрууд цэсээ буриад хэл дээр хэвлэх орж байна.

Улаан-Үд хотын тээвэр, хэрэглэгчдийн зах зээлийн байнгын хорооны дарга Юрий Ткачёв “Худалдааны том сүлжээ, төвүүдтэй хамтран ажиллах талаар ярилцана. Монголоос энэ жил маш их жуулчин ирэх төлөвтэй байгаа. Дэлгүүр, захуудад барааныхаа нэр, үнийг монгол жуулчдад ойлгогдохоор буриад, орос хоёр хэл дээр бичиж байх хэрэгтэй. Гадаад жуулчдаас гадна буриад хүүхэд багачууд ч буриад хэлээ сурахад маш хэрэгтэй” гэж ярьсан байна.