Ц.Элбэгдорж VS С.Баяр

Монгол Улсын Ерөнхийлөгч асан Ц.Элбэгдоржийн хэлсэн үг Ерөнхий сайд асан С.Баярт таалагдсангүй бололтой. Тэрбээр өнөөдөр /2022.05.17/ өөрийн нүүр хуудсаараа дамжуулж Ерөнхийлөгч асан Ц.Элбэгдоржид хандан хэдэн үг хэлжээ.

Учир нь, Ерөнхийлөгч асан Ц.Элбэгдорж өчигдөр /2022.05.16/ цахим хуудсаараа лайв хийсэн юм. Тэр АН-ынхаа алдаа, оноо хийгээд Үндсэн хуулийн өөрчлөлт, сонгуулийн тогтолцоо, С.Зориг агсны хэрэг, Улс төрийн намын тухай хууль, эрх баригчдын талаар өөрийн байр суурь, үзэл бодлоо илэрхийлсэн билээ.

Тухайлбал, Ерөнхийлөгч асан Ц.Элбэгдорж "Бид хулгайч аа, хамгийн адгийн хүмүүсээ толгой дээрээ залчихаад байна. Монгол Улсын тэр чигт нь худалдаад өөрсдийнхөө эрх ашгийг хийгээд явж байгаа тэр этгээдүүдтэйгээ хариуцлага тооцооч ээ. Тэр Эрүүгийн хуульдаа хийж өг л дөө. Хуулийн заалтад байгаа амин сүнсийг хулгайлчихаад бусдаар тэтгүүлээд явж байдаг улстөрчид байдаг шүү дээ. Хэдэн талд хэрэлдээд суугаад байх юм бол энэ улс хөгжихгүй. Улстөрчид нь наад зах нь эрх зүйн хүрээнд, байдлаар асуудлыг сэтгэдэг боддог байх хэрэгтэй байна" хэмээн тодотгосон. 

Харин Ц.Элбэгдоржийн хэлсэн дээрх үг Ерөнхий сайд асан С.Баярт таатай санагдаагүй аж.

Тэрбээр "Эбий даргын лайв. Зөв. Улсаа хөгжүүлэх, АН-ыг нэгтгэх чухал санаа олон хэлэв. Гэвч ярих зуураа АН-ын хашаа давуулан МАН, мань мэт рүү элс чулуу тувт цацах юм. Боль. Мань мэт танд, та бүхэнд сайныг хүснэ. Эхлээд хашаа хашаандаа учраа олцгооё. Бурууг өөрөөсөө, бөөсийг бандгаасаа. Бид гарал намтар, хүмүүжил боловсрол, алдаж онож ирсэн энэ амьдрал бүх юмаараа бүгд ижил төстэй. Дотоод олон асуудлаа шийдэхээс зайлсхийн гаднаас "дайсан" хайх Путины аргаас бүгд татгалзъя. Бид нэг цул. Эх орон, эрх ашиг, амьдрах амьдрал, булагдах газар маань нэг шүү. Еөк асан Ц.Элбэгдоржийг би гүнээ хүндэлдэг. Намтар түүх, туулсан зам, бүтээх гэсэн үйлс нь арвин баян. Олон түмэнд хандан ярихдаа үндэсний нягтрал талд жин дарах болов уу гэж хүлээж байв. Гэтэл 24 онхон чиглэсэн, намаа тойглосон, бурууг бусдаас хайсан яриа нь... Яах вэ, нөхөд өө" гэжээ.