АТГ-т шалгагдаж байгаа Х.Баттулгыг АН-ын даргаар бүртгэх үү?!

Өнөөг хэр нь АН-ын хууль ёсны дарга хэн болох, тамга тэмдгийг нь албан ёсоор хэн эзэмшиж байгаа нь тодорхойгүй хэвээр байна.

С.Эрдэнийн тал О.Цогтгэрэлийн талыг үгүйсгэж, О.Цогтгэрэлийн тал С.Эрдэнийн талыг хүлээн зөвшөөрөхгүй явсаар өнөөдрийг хүрлээ. 

Харин энэ цаг үед О.Цогтгэрэлын талын АН-ын даргын сунгаанд Монгол Улсын Ерөнхийлөгч асан Х.Баттулга ялалт байгуулж, түүний нэрийг АН-ын даргад бүртгүүлэхээр Улсын Дээд шүүхэд хандаад байгаа юм. 

Тэгвэл Улсын Дээд шүүхэд маргааш /2022.05.20/ Х.Баттулгыг АН-ын даргаар бүртгэх эсэхийг хэлэлцэнэ. Дээд шүүхийн шийдвэр яаж гарахаас шалтгаалж хоёр хуваагдсан С.Эрдэнэ, О.Цогтгэрэл нарын АН-ын аль нь тамга тэмдгээ эзэмших эрхтэй нь тодорхой болж, маргаанд цэг тавигдах магадлал өндөр билээ.

Улсын Дээд шүүхэд өгсөн тэдний хүсэлт, Х.Баттулгыг АН-ын даргаар сонгосон явдлыг С.Эрдэнийн тал үгүйсгэж, тэднийг шүүхэд нөлөөлөх гэж байна гэж үзэж байгаа. Нөгөө талд О.Цогтгэрэлийн талын АН-ынхан Улсын Дээд шүүхийг зөвхөн бүртгэдэг байгууллага хэмээн тодорхойлж, намын дотоод асуудалд оролцох боломжгүй хэмээн мэдэгдсэн байдаг.  

Гэвч саяхнаас хууль хяналтын байгууллагаас Монгол Улсын Ерөнхийлөгч асан Х.Баттулгыг шалгаж эхэлсэн.

Өөрөөр хэлбэл, АТГ-аас Х.Баттулгад хэрэг бүртгэл нээж, мөрдөн шалгах ажиллагаа явуулж байгаа аж. Түүнийг Хөгжлийн банкны хэрэгт холбогдуулан шалгаж байгаа талаар албан бус эх сурвалж мэдээлсэн. Ямартай ч Ерөнхийлөгч асан Х.Баттулга АН-ын дарга болсон ч АТГ-ын үүдийг хэсэгтээ сахих нь тодорхой байна. Гэхдээ тэрнээс илүү АТГ-т шалгагдаж байгаа түүнийг  Улсын Дээд шүүх маргааш /2022.05.20/ АН-ын даргад бүртгэх эсэхийг харах үлдлээ.