О.Амгаланбаатарын ээлжит сенсаци нь "Танилцах үдэшлэг"

Эрүүл мэндийн үзлэгт хамрагдсан ганц бие залуусын танилцах уулзалтыг зохион байгуулж байгаа Говь-Алтай аймгийн Засаг дарга О.Амгаланбаатарыг танилцуулж байна.

Тэрбээр Ардчилсан намын гишүүн юм. Говь-Алтайчууд улаан сонголтод үнэнч гэж хэлж болно. Өнгөрсөн жилүүдэд тус аймагт МАН эрх барьж байсан бол 2012 оны сонгуулиар Ардчилсан нам орон нутагт ялалт байгуулж, О.Амгаланбаатар Засаг дарга болсон билээ. Үүнээс хойш 2020 оны орон нутгийн сонгуулиар мөн л Ардчилсан нам ялалт байгуулж, О.Амгаланбаатар Засаг даргаар дахин томилогдсон юм.

О.Амгаланбаатар улс төрийн амьдрал сонгосноос хойш "уламжлал" ёсоор сайн ч, саар ч зүйлд нэр холбогдож яваа. Түүний зохион байгуулж буй танилцах үдэшлэг олныг шуугиулж буй анхны тохиолдол биш юм.

Тэрбээр 2016 оны сонгуулийн өмнөхөн орон нутгийн хөрөнгөөр үйлдвэрлэсэн хуванцар савтай цэвэр усан дээр өөрийнхөө зураг, албан тушаалыг хэвлүүлж, шуугиан тарьсан нэгэн.
 

Орон нутгийн хөрөнгөөр өөрийнхөө сурталчилгааг хийхийг завдсан уг үйлдлийг Авлигатай тэмцэх газар авлига хянан үзээд, Авлигын эсрэг хуулийн 7 дугаар зүйлийн 7.1.6, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 13 дугаар зүйлийн 13.1-т заасныг тус тус зөрчсөн байна гэж үзэж, сануулга өгсөн байдаг.

Үүний дараа бас нэгэн хэл аманд орж, өөрийн биеэр Авлигатай тэмцэх газарт хандсан нь саяхан. 

Орон нутгийн иргэдийн хурал хуралдах үеэр аймгийн төсвийг зориулалтын бусаар зарцуулж, хамаарал бүхий этгээдүүдэд газар олгосон, Land Cruiser авто машиныг сая төгрөгөөр өгсөн гэх асуудлыг хэлэлцэж буй бичлэг сошиал орчинд тарсан. Нэг сая төгрөгөөр Land Cruiser авто машиныг акталсан нь өндөр авсан тул О.Амгаланбаатар өөрийгөө энэ асуудалд буруугүйг нотлохын тулд Авлигатай тэмцэх газарт өөрийн биеэр хандаж байв.
 

О.Амгаланбаатар аймгийн Засаг даргаас “буусан” хугацаандаа Ерөнхийлөгч Х.Баттулгын орон тооны бус зөвлөхөөр ажиллаж байсан удаатай. 

Ийнхүү Засаг дарга болох тоолондоо дуулиан шуугианд холбогдож явдаг О.Амгаланбаатарыг энэ өвөл хатуу сорилт хүлээж байгаа. Түүний бодлоор сум, орон нутагт нь ганц бие залуучуудын асуудал тулгамдсан сэдэв болоод байгаа бол аймгийн төв тэр чигтээ хөлдөх аюултай нүүр тулсныг мартах ёсгүй. 

Аймгийн хэмжээнд үйл ажиллагаа явуулдаг уурын зуухнууд ачааллаа дийлэхгүй байгаа тул төвийн дулаанд холбогдсон ихэнх айлууд өвлийн турш “гал алдаж” суудаг нь нууц биш. Иймээс танилцах үдэшлэгээ зохион байгуулчихаад эртхэн өвлийн бэлтгэлдээ ороорой доо, О.Амгаланбаатар минь.