Б.Батцэцэг: Энхийг сахиулах эмэгтэй албан хаагчдаа нэмэхийг дэмжинэ

Монгол Улсын Ерөнхийлөгч Ухнаагийн Хүрэлсүхийн урилгаар НҮБ-ын Ерөнхий нарийн бичгийн дарга Антонио Гутерреш 2022 оны 08 дугаар сарын 08-11-ний өдрүүдэд Монгол Улсад албан ёсны айлчлал хийж байна.

Айлчлалын талаар Гадаад харилцааны сайд Б.Батцэцэг, НҮБ-ын Ерөнхий нарийн бичгийн дарга Антонио Гутерреш нар мэдээлэл хийлээ. 

Айлчлалын талаар Гадаад харилцааны сайд Б.Батцэцэг: 

-Та бүхэнд энэ өдрийн мэнд хүргэе.

Монгол Улс 1961 онд Нэгдсэн Үндэстний Байгууллагын бүрэн эрхт гишүүнээр элссэн. Өнгөрсөн 2021 онд  манай улс тус байгууллага дахь гишүүнчлэлийнхээ 60 жилийн ойг ёслол төгөлдөр тэмдэглэн өнгөрүүлж, нэгэн жарны хамтын ажиллагааныхаа ололт амжилтыг дүгнэн, цаашдын зорилго, зорилтуудаа тодорхойлсон.

НҮБ-ын Ерөнхий нарийн бичгийн дарга Антонио Гутеррешийн энэ удаагийн айлчлал нь Монгол Улс НҮБ-ын Энхийг сахиулах ажиллагаанд оролцож ирсний 20 жил, нутаг дэвсгэрээ цөмийн зэвсэггүй бүс нутаг хэмээн зарласны 30 жилийн түүхэн ойтой давхцаж байгаа нь олон улсын энх тайван, аюулгүй байдлыг бэхжүүлэхэд манай улсын  оруулж буй хувь нэмрийг өндрөөр үнэлж байгаагийн илрэл юм.

Монгол Улс хүний эрхийг дээдэлсэн, эмэгтэйчүүд ялгаварлан гадуурхалтаас ангид тэгш эрхтэй байх ёстой гэж үздэг ардчилсан улс билээ. Энэ ч үүднээс манай улс НҮБ-ын Аюулгүйн Зөвлөлийн “Эмэгтэйчүүд, энх тайван, аюулгүй байдлын тухай” 1325 тогтоолын дагуу Энхийг сахиулах ажиллагаанд оролцож буй эмэгтэй алба хаагчийн тоог 15 хувьд хүргэх уриалгыг дэмжин, 2027 он гэхэд энэхүү зорилгод хүрэх бодлого баримталж байна.

Монгол Улс 1992 онд нутаг дэвсгэрээ цөмийн зэвсэггүй бүс нутаг хэмээн зарласан. Олон улсын энх тайван, аюулгүй байдал хурцадсан  өнөө цагт манай улсын цөмийн зэвсэггүй статусын ач холбогдол улам нэмэгдэж буйг онцлон тэмдэглэж байна.

Өнгөрсөн 2021 оны 12 дугаар сард Монгол Улс Цөмийн зэвсгийг хориглох тухай гэрээг соёрхон баталсан. Манай улс цөмийн зэвсгийг үл дэлгэрүүлэх, зэвсгээр хөөцөлдөхөөс сэргийлэхийн төлөөх олон улсын хамтын нийгэмлэгийн хүч чармайлтад цаашид ч хувь нэмрээ оруулахыг эрмэлзэж байна.
 

Монгол Улс Зүүн хойд Азийн бүс нутгийн энх тайван, аюулгүй байдлыг бататган бэхжүүлэхэд Солонгосын хойгийн тогтвортой байдлыг хангах явдал нэн чухал гэж үздэг.

Монгол Улс Зүүн хойд Азийн бүс нутагт итгэлцлийг бэхжүүлэхэд хувь нэмэр оруулах зорилгоор Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” санаачилгыг 2013 онд дэвшүүлсэн. Энэ оны 6 дугаар сард манай улс “Улаанбаатарын яриа хэлэлцээ” олон улсын 7 дугаар бага хурлыг амжилтай зохион байгуулсныг мэдээлэхэд таатай байна.

Монгол Улс ЕНБД Антонио Гутеррешийн “Бидний нийтлэг зорилго” илтгэлд дэвшүүлсэн зорилт, арга хэмжээ нь цаг үеэ олсон, хөгжлийн зорилт, хөтөлбөрүүдийн хэрэгжилтийг эрчимжүүлэхэд чиглэсэн олон талт хамтын ажиллагааг бэхжүүлэхэд чухал ач холбогдолтой гэж үздэг.

Манай улс санаачлан байгуулсан Далайд гарцгүй хөгжиж буй орнуудын олон улсын судалгааны төвийг Венийн үйл ажиллагааны хөтөлбөр, Тогтвортой хөгжлийн 2030 хөтөлбөрийг хэрэгжүүлэхэд үр дүнтэй дэмжлэг үзүүлдэг, мэдлэг, инновацийн төв болгон бэхжүүлж, хөгжүүлэхэд НҮБ-тай үргэлжлүүлэн хамтран ажиллана.

Дэлхий дахинаа тулгамдаж буй уур амьсгалын өөрчлөлт, цөлжилт, хүрээлэн буй орчны доройтол зэрэг сорилтуудыг шийдвэрлэхэд бодит хувь нэмэр оруулах зорилгоор Монгол Улсын Ерөнхийлөгч У.Хүрэлсүх “Тэрбум мод” санаачилгыг дэвшүүлж,  үндэсний хөдөлгөөн өрнүүлж байна. НҮБ-ын Ерөнхий нарийн бичгийн дарга А.Гутерреш Монгол Улсын Ерөнхийлөгчийн энэхүү санаачилгыг дэмжиж, өнөөдөр Үндэсний цэцэрлэгт хүрээлэнд мод тарих арга хэмжээнд оролцоно.

Мөн манай улс  НҮБ-ын Цөлжилттэй тэмцэх конвенцийн Талуудын 17 дугаар Бага хурлыг 2026 онд Улаанбаатар хотноо зохион байгуулна.

Монгол Улсын Засгийн газар НҮБ-тай энэ оны 5 дугаар сард байгуулсан 2023-2027 онд хэрэгжүүлэх “Тогтвортой хөгжлийн хамтын ажиллагааны хүрээ”-нд үндэсний хөгжлийн зорилтуудад уялдуулан хүний хөгжил, ногоон хүртээмжтэй, тогтвортой өсөлт, хүн төвтэй засаглал, эрх зүйт ёс, хүний эрх гэсэн 5 тэргүүлэх чиглэлээр НҮБ-тай нягт хамтран ажиллана. Нэн ялангуяа, манай улсын боловсролыг шинэчлэх, “Цахим үндэстэн” болох, сэргээгдэх эрчим хүчийг гол эрчим хүчний хангамж болгох зорилтуудыг хэрэгжүүлэхэд НҮБ-ын туслалцаа, дэмжлэг чухал үүрэг гүйцэтгэнэ гэж үзэж байна. Анхаарал тавьсанд баярлалаа.

НҮБ-ын Ерөнхий нарийн бичгийн дарга А.Гутерреш:
 

-Хэвлэл мэдээллийн салбарын төлөөлөгчид, ноёд хатагтай нар аа,

Дөнгөж сая миний бие Монгол Улсын Гадаад харилцааны сайд, Эрхэмсэг хатагтай Батмөнхийн Батцэцэгтэй маш үр дүнтэй уулзалт хийлээ. Гадаад харилцааны сайд Танд болон Ерөнхийлөгч Ухнаагийн Хүрэлсүх, Монголын ард түмэнд биднийг халуун дотноор хүндэтгэн хүлээн авсанд гүнээ талархаж буйгаа илэрхийлье.

Монгол Улс НҮБ-д бүрэн эрхт гишүүнээр элссэний 60 жилийн ойг өнгөрсөн онд тэмдэглэсэн билээ. Өнгөрсөн 60 жилийн хугацаанд Нэгдсэн Үндэстний байгууллагын үйл ажиллагаанд Монгол Улсын оруулж буй  хувь улам нэмэгдэж ирсэн.

Монгол Улс НҮБ-ын Энхийг сахиулах ажиллагаанд оролцож эхэлсний 20 жилийн ой энэ онд тохиож байна. Монгол Улсын нийт энхийг сахиулагчдад НҮБ-ын Энхийг сахиулах ажиллагааны хамгийн хүнд хэцүү талбарт үүрэг гүйцэтгэсэнд талархал илэрхийлье.

Дайны хөлд нэрвэгдсэн улс орнуудад энх тайван, тогтвортой байдлыг дэмжин бэхжүүлэхийн төлөө хичээн зүтгэж, мэргэжлийн өндөр ур чадвар харуулан, хүлээсэн үүргээ биелүүлж байгаад нь бид гүнээ талархаж байна.

“Эмэгтэйчүүд, энх тайван ба аюулгүй байдал” санаачилгыг хэрэгжүүлэхэд Монгол Улс тэргүүлэх үүрэгтэй оролцож буйд би нэн талархаж байна.

Монгол Улс энхийг сахиулагч эмэгтэйчүүдийн тоог нэмэгдүүлэхэд санаачилга гарган ажиллаж байгаагийн зэрэгцээ энэ оны 6 дугаар сард Улаанбаатар хотноо энхийг сахиулах ажиллагаанд оролцож буй эмэгтэйчүүдийн асуудлаар олон улсын хурлыг зохион байгуулсан билээ.

Энэ нь дэлхий нийтийн хамтын зорилт болох жендэрийн тэгш байдлыг хангах явдалд Монгол Улсын оруулж буй хувь нэмэр, манлайлал, эв санааны нэгдэл, тууштай хүч чармайлтын илрэл юм. Олон талт механизмд Монгол Улсын үзүүлж буй дэмжлэг нь НҮБ-ын Энхийг сахиулах үйлсэд оруулж буй хувь нэмрээр хязгаарлагдахгүй юм.

Монгол Улс нутаг дэвсгэрээ цөмийн зэвсэггүй бүс хэмээн зарласнаар цөмийн зэвсгийг үл дэлгэрүүлэх, зэвсэг хураах бодлого баримталж буйгаа олон улсын хамтын нийгэмлэгт харуулсан. Эх дэлхийг цөмийн зэвсгээс ангид болгохын тулд бусад улс ч Монгол Улсыг үлгэрлэн дуурайна гэдэгт би найдаж байна.

Монгол Улс бүс нутагтаа энх тайван, аюулгүй байдлыг хангахад чухал үүрэг гүйцэтгэдэг. Зүүн хойд Азийн аюулгүй байдлын асуудлаарх “Улаанбаатарын яриа хэлэлцээ” санаачилгыг гаргасан нь үүний тод жишээ юм.

Залуучуудын оролцоог нэмэгдүүлэх нь “Бидний нийтлэг зорилго” илтгэлд миний тусгасан тэргүүлэх зорилтуудын нэг мөн.  Энэхүү яриа хэлэлцээнд залуучуудын дуу хоолойг оролцуулсан нь  надад урам зориг өгч байна.

Олон талт механизмд Монгол Улсын оруулж буй хувь нэмэр нь хөгжлийн салбар, Тогтвортой хөгжлийн зорилгуудыг биелүүлэх хүрээг ч хамарч байна.

Монгол Улс Далайд гарцгүй хөгжиж буй орнуудын бүлгийг 1994 онд үүсгэн байгуулахад манлайлан оролцсон билээ. Улмаар Далайд гарцгүй хөгжиж буй орнуудын Олон улсын судалгааны төвийг 13 жилийн өмнө Улаанбаатарт байгуулсан. Далайд гарцгүй хөгжиж буй орны хувьд Монгол Улс нь худалдаа, тээвэр, холболтын олон бэрхшээлтэй тулгарч байна. Эдгээр сорилт нь Ковид-19 цар тахал, Украин дахь дайн, улам бүр нэмэгдэж буй уур амьсгалын өөрчлөлтийн улмаас улам хүндэрч байна.

Монгол Улсын хүнсний аюулгүй байдалд олон жилийн ган гачиг нь нөлөөлж, нийт газар нутгийнх нь 77 орчим хувь цөлжилтөд нэрвэгджээ.

Монгол Улсын Засгийн газар эдгээр сорилтыг даван туулахын тулд уур амьсгалын өөрчлөлт, цөлжилттэй тэмцэхийн төлөө чармайн ажиллаж, энэ хүрээнд “Нэг тэрбум мод” зэрэг санаачилгыг хэрэгжүүлж байна.

Байгалийн нөөцийн тогтвортой менежментийг хэрэгжүүлэх замаар уур амьсгалын өөрчлөлтөд  дасан зохицуулахад Монгол Улсыг  жишээг бид сайшааж байна.

Монгол Улс өөрийгөө төдийгүй бусад улсыг хангахуйц сэргээгдэх эрчим хүчний их нөөцтэй тул сэргээгдэх эрчим хүчний салбарт тэргүүлэгч болох боломжтой. Монгол Улс эрчим хүчний аюулгүй байдлыг хангахын зэрэгцээ эдийн засгийн боломжуудыг бий болгож чадна гэж би үзэж байна. Мөн Монгол Улс сэргээгдэх эрчим хүчний хангамжийн сүлжээнд зэсийн нөөцөөрөө томоохон тоглогч болох боломжтой юм. Далайд гарцгүй хэдий ч Монгол  Улсын яриа хэлэлцээ, хамтын ажиллагааг чухалчилсан бүтээлч гадаад бодлого нь улс орнуудын хооронд гүүр болж, тогтвортой хөгжлийг урагшлуулахад дэмжлэг болж байна.

Монгол Улс сүүлийн жилүүдэд гайхалтай шилжилтийг хийж чадсан. Монгол Улсын удирдагчид бүх ард иргэдийнхээ өнө удаан хөгжил дэвшлийн төлөө цаашид ардчиллыг бэхжүүлж, хүний эрхийг дээдлэн хамгаална  гэдэгт би итгэж байна.

НҮБ-ын үйл ажиллагаанд  хувь нэмэр оруулж ирсэнд Монгол Улсад талархал илэрхийлэхийн сацуу энх тайван, хүний эрх, тогтвортой хөгжлийн асуудлуудын хүрээнд танай улсад бидний үзүүлэх дэмжлэгт цаашид ч найдаж болно гэдгийг илэрхийлж байна. Баярлалаа.