Д.Ганбат өөрийг нь О.Цогтгэрэлээр сольсоныг эсэргүүцэж, УИХ-ын даргад хандлаа 

Хуульд өөрчлөлт оруулж байж Д.Ганбатыг УИХ дахь АН-ын бүлгийн даргын албан тушаалаас нь огцруулсан билээ. Харин түүний оронд УИХ дахь АН-ын бүлгийн даргаар хэнийг сонгох нь таамаг төдий байсан юм. 

Тэгвэл өнөөдөр /2022.08.22/ тус намын гишүүд хуралдаж, УИХ дахь АН-ын бүлгийн даргаараа О.Цогтгэрэлийг сонгожээ. Харин үүнийг УИХ дахь АН-ын бүлгийн даргаар ажиллаж байсан Д.Ганбат эс хүлээн зөвшөөрч УИХ-ын дарга Г.Занданшатарт албан бичиг хүргүүллээ.

Уг бичигт Монгол Улсын Их Хурал дахь Ардчилсан намын бүлгийн даргыг томилох талаар хууль бус үйлдэл гарч, энэ нь Монгол Улсын хууль тогтоомжийг дараах байдлаар зөрчсөн байгааг дурьджээ. Тухайлбал,

Нэр бүхий зарим гишүүд хуралдаж уг асуудлаар шийдвэр гаргахдаа Улсын Их Хурлын тухай хуулийн 31 дүгээр зүйлийн 31.12-ыг зөрчиж бүлгийн нийт гишүүдийг оролцуулахгүйгээр хуралдсан байна. Хуралд миний бие Улсын Их Хурлын гишүүн Д.Ганбат, Д.Бат-Эрдэнэ, А.Адъяасүрэн нар оролцоогүй, Улсын Их Хурлын гишүүн Б.Пүрэвдорж гадаад улсад албан томилолттой байгаа болно. Ингэснээрээ Улсын Их Хурал дахь Ардчилсан намын бүлгийн даргад нэрээ дэвшүүлж өрсөлдөх эрхтэй эдгээр гишүүдийн эрхийг бүдүүлгээр зөрчиж хуулийн 31 дүгээр зүйлийн 31.12–т заасан "нийт гишүүдийн олонхийн саналаар шийдэх" зохицуулалтыг шууд зөрчсөн байна.

Ардчилсан намын Үндэсний бодлогын хорооны 2022 оны 06 дугаар сарын 02-ны "өдөр баталсан Улсын Их Хурал дахь Ардчилсан намын бүлгийн үйл ажиллагааны дүрмийн 7 дугаар зүйлийн 7.2-т "Бүлгийн дэд даргыг томилж, чөлөөлөх асуудлыг бүлгийн даргатай, бүлгийн даргыг томилж, чөлөөлөхөд ҮБХ-ны дарга, тэргүүлэгчидтэй тус тус зөвшилцөн АН-ын дарга шийдвэрлэнэ" гэж заасан. Гэтэл нэр бүхий гишүүд хуралдахдаа дүрмийн энэ заалтыг зөрчиж улмаар Улсын Их Хурлын тухай хуулийн 22 дугаар зүйлийн 22.13-т заасан "Нам, эвслийн бүлгийн хуралдааны журмыг тэдгээрийн дүрмээр зохицуулна" гэснийг мөн зөрчжээ.

Түүнчлэн нэр бүхий гишүүдийн удирдлага болгож буй Улсын Их Хурлын тухай хуулийн 31 дүгээр зүйлийн 31.12 дугаар зүйл Монгол Улсын Үндсэн хууль зөрчсөн эсэхийг тогтоохоор иргэний мэдээллийн дагуу Монгол Улсын Үндсэн Хуулийн Цэц дээр ажиллагаа явагдаж эхэлснийг Танд мэдэгдье. Дээрх хууль бус үйл ажиллагаа, маргаантай нөхцөл байдлыг харгалзан үзэж хууль дээдлэх зарчмын дагуу уг асуудалд хандахыг Танаас хүсье гэсэн байна.