Лу.Гантөмөр туг тойрсон ч Х.Баттулга бууж өгөхгүй

Ардчилсан нам (АН)-ын даргаар бүртгүүлэх Лу.Гантөмөрийн хүсэлтийг Улсын дээд шүүх (УДШ) бүртгэв. Ажиглаачид үүнийг “Үндсэн хуулийн өөрчлөлтөд МАН-д хүч нэмэх есөн кнопны тохироо” гэв. Зарим нь С.Эрдэнэ, Х.Баттулга хоёр “эвдэрхий тэвштэйгээ үлдлээ” хэмээн шогложээ. Гэхдээ маргааш юу болохыг хэн ч таашгүй.

Хэдийгээр Лу.Гантөмөр намын хаа нэг хэсгийн эвийг эвхэж, элэг бүсээ чангалж аваад туг тойрсон ч Х.Баттулга бууж өгөхгүй. Лу.Гантөмөртэй барьцуулан “Намын дарга” хэмээн УДШ-ийн босгоор хүсэлт бичгийг нь хүргүүлчихээд байсан Д.Ганбатыг буцаагаад “хүүхэлдэйн тавиур”-т  залсан ч С.Эрдэнэ гэж элдэвтэй нөхөр өөр  ямар ч  хувилбар гаргаж ирж мэднэ. Энэ нь ч  өчигдөр Дээд шүүхийн гадаа хийсэн АН-ын гишүүд, дэмжигчдийн жагсаалаас тов тодорхой харагдана лээ.

Х.Баттулгын багийнхан,  С.Эрдэнийн дагагчид ирчихсэн  нэгдсэн байдлаар жагсаал, цуглаан хийсэн учир хоёр тал  нэгдсэн гэж ойлгогдож байгаа юм. Ярьж буй зүйл нь Х.Баттулгын талаас АН-ын генсекээр тавигдсан И.Мөнхжаргал тэргүүтэй залуус  бол Л.Гантөмөрийг ч, Д.Ганбатыг ч  батлуулахгүй байх. Ерөнхийдөө АН-ыг Х.Баттулга л даргалж чадна гэсэн утгатай шаардлага гэх үү, шахалт, шантааж гэх үү зүйлүүдийг хашгиралдаж байсан. Тэдний үзэж буйгаар бол АН-ын 200 гаруй мянган гишүүний 117 мянган хүний саналыг авсан хүн ганцхан Х.Баттулга  юм гэнэ.

С.Эрдэнийн дагагчид бол  “Д.Ганбатыг батлах ёстой” хэмээн орилж байсан. Зарим нь УДШ-ийг эрх баригчдын “охин компани” хэмээн цоллоод авна лээ. Намынхаа дотоодод нүүрсний хулгай, Хөгжлийн банк, ББСБ-аар мөнгө угаасан сүлжээ, койны хэрэг гээд олон дайсантай болсон МАН-ын хувьд өрсөлдөгчөө хүчтэй байлгах дургүй байж мэдэх ч  АН-ын асуудлаар шүүхэд нөлөөлөх хүртэл анхаарал тавина гэдэг юу л бол. Угаасаа л Ардчилсан намынхны байгаа царай, эрх мэдэл, албан тушаал, тамга тэмдэг­ний дажин нэг иймэрхүү. Аль аль талынх нь Улсын Дээд шүүхэд, шүүх хурлын үйл ажиллагаа, гар­гах шийдвэрт нөлөөлөх гэсэн оролд­лого. Мөн Лу.Гантөмөрийг бат­луулахгүй байх гэсэн явуулга байв. Эцэст нь УДШ-ийн нийт шүүгчдийн хуралдаанаас Лу.Гантөмөрийн нэрийг бүртгэсэн шийдвэрийг гаргасан. Х.Баттулгыг яагаад бүртгээгүй вэ гэвэл намын тамга хуурамч, хүсэлт гаргасан хуулийн этгээд нь үндэслэлгүй гэсэн тайлбарыг С.Эрдэнэ хийж байсан. Харин Д.Ганбатыг ямар учраас бүртгэсэнгүй вэ гэдэгт УДШ-ийн гаргасан үндэслэл одоогоор тодорхойгүй байна.

Энэ бүхнээс үзвэл АН-ын “Еэвэнгийн үлгэр” мөддөө ч амар сайхандаа жаргахгүй. Гурван жил “Морь унасан толгойгүй нам” явсан түүх дахиад л давтагдана гэсэн үг.

Одоохондоо бол Лу.Гантөмөрт наад зах нь Шадар сайдын суудал харагдчихсан л гүйж яваа байх. Цаашилбал зүүдэнд нь “Эмээл хазаарай морь” үүрсэнэ, ер нь тэгээд түүнээс ч их юм болно доо.  Гэвч АН-ын 200 гаруй мянган гишүүний гол  цөмийг бүрдүүлдэг МоАХ-чуудыг Х.Баттулга дагуулж гараад  шинэ нам байгуулчихвал Лу.Гантөмөрт фронт командлах боломж олдохгүй л болов уу.

Ч.ЗОТОЛ

Эх сурвалж: ӨГЛӨӨНИЙ СОНИН