ХАЛУУН СЭДЭВ I Төрийн сайдыг тэнэгрэл дагадаг уу!

Боомтын сэргэлт хариуцсан сайдаар томилогдсон Х.Булгантуяа гишүүн сүүлийн өдрүүдэд цахим орчинд нэлээд хүчтэй шүүмжлүүлж байна. Нэг хэсэг хилийн цэргийнхнийг нь ёслууллаа гэж шүүмжлүүлсэн.

Энэ ч яах вэ, өөрийн эрхлэх асуудлынхаа хүрээнд боомтуудаар явж ажил байдалтай нь танилцах үеэр хилийн цэргийнхэн ёсолсон байж болно. Үүнд нэг их буруу, зөв гээд байх зүйл байхгүй. Харин тэр хүүхдийн хүчирхийллийн эсрэг “Шүгэл” хэмээх төсөл санаачлан хэрэгжүүлэхээр болж, түүнийхээ талаар сэтгүүлчдэд мэдээлэл өгөв. Харамсалтай нь түүний санаачилсан эл төсөл олон нийтийн дэмжлэгийг авах гэхээсээ илүүтэй уур уцаарыг нь төрүүлэв бололтой. Учир нь эрхэм сайдтан жижигхэн шүгэл гаргаж ирээд “Хүчирхийлэлд өртөж байгаа хүүхэд энэ шүглийг үлээнэ” гэж хэлсэн бололтой юм. Тэгэхээр нь хэн нэгэн “Баатар” гарч ирээд өнөө хүчирхийлэлд өртөж буй хүүхдийг аврах ажээ. Мөн сайд маань “Хүүхэд хүчирхийлэлд өртөхөөс сэргийлж хамгааллын шүгэлтэй болох ажиллагааг УИХ дахь эмэгтэй гишүүд санаачилж байна” гэжээ. Баянзүрх дүүргээс уг төслийг хэрэгжүүлж, сургуулиудад шүгэл тарааж эхэлсэн байна. Гэвч үнэхээр цаг үеэ мэдэрсэн ч гэсэн санал, санаачилга нь хол зөрчихлөө.

Мэдээж гудамжинд хүчирхийлэлд өртсөн тохиолдолд энэ нь биелж болох магадлалтай ч манайх шиг орчин нөхцөлтэй улсад бүтэхгүй л болов уу. Юун түрүүнд хүмүүсээ соён гэгээрүүлэх, гудамж талбайгаа камер, гэрэлтүүлэгтэй болгох нь нэн чухал. Мөн золбин нохой, муурын тоо толгойд анхаарах хэрэгтэй. Түүнээс биш гудамжны нохой дайрахад нь шүгэл нэмж үлээвэл бүр илүү олон нохой ирнэ. Эсвэл хэн нэгэн мундаг пиарчин нөхөр “Хүүхдийн хүчирхийлэл гэж их ярьж байгаа цагт шүгэл үлээлгэвэл яг болохоор байна” гэж зөвлөсөн юм болов уу.

Ердөө гуравхан настай жаал ээжийнхээ хамтран амьдрагчид зодуулаад өдгөө ухаан ороогүй эмнэлгийн орон дээр 16 хонож байна. Х.Булгантуяа сайдын ярьж байгаа шиг тухайн хүү шүгэл үлээж тусламж дуудаж чадах байсан болов уу. Өнөөх хэрцгий нөхөр ч гэсэн зүгээр харж зогсоод шүглийг нь үлээлгэх байв уу гэсэн олон асуулт гарч ирнэ.    

Х.Булгантуяа сайд уг нь энэ парламентад байгаа хамгийн хий багатай гишүүдийн тоонд ордог нэгэн байв. Сангийн дэд сайдаар ажиллаж байхдаа ч гэсэн олон нийтийн талархлыг хүлээж, улмаар Их хурлын гишүүнээр ард түмэн сонгосон. Гэтэл ердөө хэдхэн сарын өмнө Төрийн сайдын суудал, намынхаа эмэгтэйчүүдийн байгууллагын дарга гээд олон давхар дээлийг нэгэн зэрэг өмссөн. Гэвч дан дээлтэй байхдаа олж авсан нэр хүндээ давхар дээл өмсөнгүүтээ ийн хугалж орхилоо.

Уг нь шийдвэр гаргах түвшинд, сайдын суудалд заларсан тэрбээр үүнээс арай дорвитойхон зүйл санаачилж, хүүхдийн эсрэг хүчирхийллийг бууруулах, огт байхгүй болгоход анхаарлаа хандуулж, олон хүмүүстэй санал бодлоо уралдуулж, зөв зүйтэй шийдвэр гаргаад явбал дээрсэн. Даанч энэ мэт үйлдлийг нь харахаар нэг бодлын төрийн сайд болохоор тэнэгрэл бас дагаад ирдэг юм болов уу гэсэн бодол ч төрж байна. Үнэхээр ийм байж ч болох юм. Учир нь Монгол ардын үлгэр, домогт хаад ноёд нь ихэвчлэн “тэнэг”, ард түмэн нь ухаантайгаар дүрслэгддэг шүү дээ. Тэгэхээр хэзээнээсээ хэт их эрх мэдлийг тэнэгрэл дагаж байсан ч байж мэдэх юм.

Эх сурвалж: ӨГЛӨӨНИЙ СОНИН