С.Эрдэнэ АН-ын тамгыг албан ёсоор Л.Гантөмөрт хүлээлгэн өглөө

 Төр, нийгмийн нэрт зүтгэлтэн С.Зориг агсаны мэндэлсэн өдрөөр АН нэг зорилгын төлөө нэгдмэл байр суурьтай ажиллахаа илэрхийллээ. Энэ өдөр АН-ын дарга асан С.Эрдэнэ намынхаа шинэ удирдлага Л.Гантөмөрт тамгаа албан ёсоор хүлээлгэн өглөө.

Тэрээр "Өнөөдөр Ардчилсан намд үүсээд байсан үл ойлголцлыг эцэслэж, нэгдмэл нэг удирдлагатай болж, цаашдаа бид эв нэгдлээ бэхжүүлж, улс орныхоо өмнө тулгамдаад байгаа олон сорилт, шалгалтуудыг хамтдаа давна гэсэн зорилготойгоор өнөөдөр Зөвшилцлийн санамж бичиг байгуулж байна.

Хамгийн гол асуудал бол АН-ын нийгэмд гүйцэтгэх үүрэг, хариуцлага бол Монголын ард түмний хүсэн хүлээж байгаа асуудал. Нийгэмд өнөөдөр АН-ынхан хоорондоо эв зүйгээ олж, эвлэлдэн нэгдэж, улс орны өмнө тулгамдаад байгаа олон асуудлуудыг шийдээсэй гэдэг хүлээлттэй болсон. Ялангуяа өнөөдрийн эрх баригчдын хэт даварсан, нэг намын дарангуйллыг бий болгосон бусармаг үйл явдлыг таслан зогсоож чадах цорын ганц улс төрийн хүчин бол АН гэж ард түмэн харж байгаа. Бид ч ийм үүрэг хүлээсэн гэдгээ ухамсарлаж, ойлголцлоо. Тэр ч утгаараа бид удирдлагын түвшинд үл ойлголцлыг эцэслэж, цаашид нийгмийн өмнө хүлээх үүрэг хариуцлагаа ухамсарлаж, өнөөдрийн шийдвэртэй алхмыг хийж байна.

АН-ын шинэ дарга Л.Гантөмөр өнөөдөр ажлаа албан ёсоор хүлээн авч, үүнийгээ тойроод бид нэгдмэл, нэг цул улс төрийн хүчин болж цаашдаа ажиллах зайлшгүй шаардлага байгаа" гэв.