Дроны дайралтын дараа Зеленский “Дайн Оросын нутаг руу эргэж байна” гэв

Өнгөрсөн ням гаригт ОХУ-ын нийслэл Москва хотын Кремлиэс 5.5 километрийн зайд орших IQ-Квартал цамхагт дрон унаж, нэг хамгаалагч шархадсан явдал гарлаа.

Үүний дараагаар Москвагийн Внуково нисэх онгоцны буудлын үйл ажиллагааг түр зогсоож, нислэгүүдийг түр хойшлуулсан байна.

Хэдийгээр Украины тал халдлагыг үйлдсэн гэж мэдэгдээгүй ч гэлээ Владимир Зеленский өчигдөр орой цахимаар мэдэгдэл хийхдээ “Дайн аажмаар Оросын нутаг дэвсгэр рүү эргэж, тэдний бэлгэ тэмдэг болсон газрууд, цэргийн баазыг чиглэж байна. Энэ бол нэн шударга, зайлшгүй болох ёстой үйл явдал юм” хэмээн мэдэгдлээ.
 

ОХУ-ын төр засаг дроны дайралтыг “Украины дэглэмийн алан хядах ажиллагаа” гэж тодорхойлоод гурван дроны нэгийг Одинцовогийн ойролцоо агаарт нь устгасан бол үлдсэн хоёрын дайралтаас хамгаалахад Москва-Сити дүүрэгт унасан гэж мэдэгджээ.

BBC дэх Украины төлөөлөгч Юрий Игнат болсон явдлын талаар ярихдаа “Дайн бидэнд хамаагүй гэж бодож байгаа хүмүүст харин ч их хамаатай шүү. Орост одоо ямар нэгэн зүйл нисч ирээд, тэсэрч дэлбэрч магадгүй гэсэн айдас бий болсон. Тиймээс Оросын нутаг дэвсгэрт амар амгалан байх тухай яриа байхгүй. Тэд хүссэнээ хүртэж байна” хэмээн мэдэгджээ.

Тэгвэл ОХУ-ын Ерөнхийлөгч асан Дмитрий Медведев Тэнгисийн цэргийн флотын ойн өдрийн мэндийг дэвшүүлэхдээ “Бидэнд өөр гарц үлдэхгүй бололтой. Тиймээс манай дайчдад дайснууд залбирах л хэрэгтэй. Манай дайчид л дэлхий даяар цөмийн гал асаахгүй байгаа юм шүү” хэмээн цохон тэмдэглэжээ.