Бодлого бус бодлоо ярьсан ХҮН

ХҮН уг нь сайн сайхан зүйл ярьсаар 2020 оны сонгуульд оролцож, Т.Доржханд гэх нэг гишүүнтэй болсон. Болоогүй, нийслэл, дүүрэгт ч хэд, хэдэн төлөөлөгчтэй болоод амжсан. Харамсалтай нь тэд өнөөдрийг хүртэл улс орны хөгжлийн төлөөх бодлого гэхээр зүйл нэгийг ч ярьсангүй. Саарал ордонд сууж буй гишүүн нь хов жив, хэрүүлийн чанартай зүйлсийг ам хуурайгүй ярьсаар ирэв. Нэг хэсэг Хөгжлийн банкны хэргийн сонсгол нэрийн дор баахан хүн өөрийн дураар загнаж, бараг л шүүгчийн ажил хийсэн. Нэг ёсондоо төгс боловсорсон “ПОП” гэдгийг улс төрийн хүрээнийхэн ярьдаг. Дээрээс нь нэмээд эрх баригч намын халаасанд бүрэн бүрэлдэхүүнээрээ багтчихсан. Тэдний юу хэл гэснийг хэлж, юу хий гэснийг нь хийдэг тухай ч яриа гарч л байдаг.

Мөн саяхан УИХ-ын дарга Г.Занданшатарын захирамжаар Нүүрсний сонсголыг зохион байгуулах Ажлын хэсгийн хуралдаан дээр УИХ-ын гишүүн Т.Доржханд "Түр хороог сөрөг хүчин авч явах ёстой. Гэхдээ С.Ганбаатар гишүүний нэр орж ирж байгаад гайхаж байна. Нүүрсний пирамидын орой дээр нь байгаа толгойлогчтой хөтлөлцөөд орон нутгаар яваад байгаа шүү дээ" хэмээн хэлсэн. Үүгээрээ эрх баригч намын төлөөлөл буюу Хууль зүй, дотоод хэргийн сайд Х.Нямбаатараар уг ажлын хэсгийг ахлуулах сонирхолтой байгаагаа илэрхийлээд авах шиг болсон. Харин түүнийх нь хариуд УИХ-ын гишүүн С.Ганбаатар "Хэнтэй хөтлөлцөхөө би өөрөө мэдье. Би хараат бусаар ажиллаад ирсэн. Хүүхдийн асуултад ингэж л хариулъя" гэсэн юм. Үнэхээр ч С.Ганбаатарынхаа дэргэд Т.Доржханд бол “Хүүхэд” л дээ. Улс төрд алхсан цаг хугацаа, урдуураар попорч болох сэдэв гаргадаггүйгээр нь хаана нь ч хүрэхгүй. Хүн бүрийн хүсэн хүлээж байсан ХҮН-ийн төлөөлөл нь өнөөдөр нэг иймэрхүү байдалтай л тууж явна.

Тэгвэл ХҮН-ийн төлөөллүүд ёстой л нөгөө “Дээрээ суудлаа олохгүй бол доороо гүйдлээ олохгүй” гэдэг шиг болсон бололтой. Хоёр хоногийн өмнө ХҮН-ийн төлөөлөл мэдээлэл хийж “Бага ангийн сурагчдыг дүрэмт хувцасгүй байлгах” хэрэгтэйг дуулгав. Сонин юм шүү, есдүгээр сарын нэгэн тулчихсан. Эцэг, эхчүүд хүүхдүүдийнхээ дүрэмт хувцасыг хэдийнэ бэлдчихсэн үед тэдний санаад ийм бодол орж ирж л байдаг. Бодол гэсэн минь андуураагүй юм шүү. Тэдний дэвшүүлсэн энэ санаа бол ширээ тойроод суухдаа залуусыг өөр зуураа хэлэлцэж л байдал бодол учраас тэгсэн хэрэг. Түүнээс биш бодлого гэхээр зүйл юм ч байхгүй нь гачлантай.

Бодлого боловсруулж, эдийн засгаа хэрхэн сэргээх, өдөр тутам унаж буй төгрөгийн ханшийг яаж сэргээх, өргөн хэрэглээний бараа бүтээгдэхүүний үнийн өсөлт гээд уг нь яривал, хийвэл зөндөө асуудал бий. Үгүй ядахдаа үерийн далан дээр барьсан хувийн хэвшлийн барилга байгууламжийг хүчээр нурааж байгаатай холбоотойгоор дуу хоолойгоо хүргэсэн бол олон нийт талархан хүлээж авах байлаа. цаашлаад тэдгээр газруудыг ямар эрх мэдэлтэн, хэзээ өгсөн. Одоо ямар албан тушаал хашиж явааг нь олон нийтэд ил тодоор гаргаад тавьчихсан бол боломжийн үнэлгээ ч авч болохоор байв. Харамсалтай нь тэдэнд ярьдаг шигээ бодлого боловсруулах толгой байхгүй бололтой. Тиймээс л олон нийтэд харагдаж, ярьж л байвал юу ч хамаагүй гэсэн байдлаар хандаж ийнхүү бодлоо хэлцгээчих шиг болов.

Ийнхүү өнгөрсөн сонгуулиар иргэд нэлээд өндөр итгэл найдвар хүлээлгэж сонгосон ХҮН өнөөдрийн байдлаар бодлого бус бодлоо ярьдаг ХҮН болон хувирлаа.

Эх сурвалж: ӨГЛӨӨНИЙ СОНИН