ТАНИЛЦ: 1,3 тэрбум гаруй сүсэгтэнтэй католик шашны тэргүүн Пап Францисын ЗАМНАЛ

Монгол Улсын Ерөнхийлөгч Ухнаагийн Хүрэлсүх Гэгээн Ширээт Улсын төрийн тэргүүн Пап Францисыг жанжин Д.Сүхбаатарын талбайд өнөөдөр албан ёсоор  угтан авсныг мэдээлсэн билээ.

Пап Францисын намтар мэдээллийг хүргэе.

Пап нь дэлхийн 183 улстай дипломат харилцаатай Гэгээн Ширээт Улсын төрийн тэргүүн бөгөөд 1,3 тэрбум гаруй сүсэгтэнтэй католик шашны тэргүүн юм.

Тэрбээр Гэгээн Ширээт Улсын гадаад бодлого, дипломат үйл ажиллагааг өмнөх үеэс илүү идэвхтэй хэрэгжүүлж байгаа бөгөөд 2013-2023 онд 62 улсад, үүнээс Мьянмар, Арабын Нэгдсэн Эмират, Ирак, Бахрейн зэрэг улсад  анх удаа айлчилжээ. 

Гэгээн Ширээт Улсын төрийн тэргүүн Пап Францис 2013 оны гуравдугаар сарын 13-нд 266 дахь Пап-аар сонгогдсон. Европ бус тив болон Есүсийн нийгэмлэг буюу Иезуитын нийгэмлэгээс сонгогдсон анхны Пап.

1936 оны арванхоёрдугаар сарын 17-нд Аргентин Улсын Буэнос Айрес хотноо төрсөн.

Боловсрол:

1986 онд ХБНГУ-ын Франкфурт хотын Гүн ухаан, шашны номлол судлалын Ариун Жоржийн Их сургуульд докторын зэрэг,

1970-1971 онд Испани Улсын Алкала дэ Энаресын Их сургуульд эрдмийн зэрэг,

1967-1970 онд Сан Хосегийн коллежид Шашны номлол судлалын эрдмийн зэрэг,

1963 онд Сан Мигель хотын Сан Хосегийн коллежид Гүн ухааны лиценциатын зэрэг,

1958-1960 онд Чили Улсад хүмүүнлэгийн чиглэлээр суралцсан,

1955-1958 онд Буэнос Айрес хотын Католик шашны Вилья-Девото сургууль,

Буэнос Айрес хотын Аж үйлдвэр, техникийн 27 дугаар дунд сургуулийг химийн технологич мэргэжлээр төгссөн.

Ажилласан байдал:

2013 оны гуравдугаар сарын 13-нд 266 дахь Пап-аар сонгогдсон,

2001-2013 онд Гэгээн Ширээт Улсын Кардиналаар томилогдож, Санваартны асуудал хариуцсан яам, Зан үйл ёслолын асуудал хариуцсан яам, Католик шашны байгууллагуудын асуудал хариуцсан яаманд ажилласан,

1998-2001 онд Буэнос Айресын тэргүүн хамба,

1992-1998 онд Буэнос Айресын хамба,

1986- 1992 онд Аргентины Кордода хотын тэргүүн хамбын газарт санваартан,

1980-1986 онд Сан Хосегийн коллежийн ректор,

1973-1979 онд Аргентин дахь Иезутын нийгэмлэгийн тэргүүн,

1969-1973 онд Аргентин дахь Иезутын нийгэмлэг,

1969 онд Сахил хүртсэн,

1964-1966 онд Санта Фе, Буэнос Айрес хотын Католик шашны коллежид утга зохиол, сэтгэл судлалын багш,

1958 онд Есүсийн нийгэмлэг буюу Иезутын нийгэмлэгт элссэн,

Испани, итали, герман хэлтэй.