Палестин-Израилийн мөргөлдөөн ХЭРХЭН ҮРГЭЛЖИЛЖ байна вэ

-    Байлдааны ажиллагааны шинэ үе шат - 

ЦАХАЛ шөнийн ажиллагааныхаа үеэр ХАМАС хөдөлгөөний гурван ротын командлагчийг устгаснаа зарлажээ. Израилийн цэргийнхний мэдээлснээр, Израилийн Батлан хамгаалах армийн удирдлагууд байлдааны үйл ажиллагааныхаа дараагийн үе шатны төлөвлөгөөг баталжээ. Энэ хооронд Палестины хөдөлгөөний байлдааны нэг жигүүр Израилийн Раим цэргийн бааз руу гал нээсэн талаараа мэдэгдсэн байна. Үүнээс гадна Ливаны “Хезболла” бүлэглэл Израилийн цэргийнхний казарм руу пуужингаар гал нээжээ.

Мөн энэ зуур мөргөлдөөний бүс дэх гадаадын иргэдийг нүүлгэн шилжүүлэх ажил үргэлжилж байгаа юм. Түүнчлэн хүмүүнлэгийн ажиллагаа эхэлж, улс орнууд Газын зурвас руу Каираар дамжуулан хүмүүнлэгийн тусламж хүргэсээр байгаа аж. Өдөр бүр нүүлгэн шилжүүлэх ажил явагдаж байгаа ч байдал маш тогтворгүй байгааг мөргөлдөөний бүсэд ажиллаж байгаа сэтгүүлч нар мэдээлжээ. Улс орнуудын Газын зурвас руу хүргэж буй хүмүүнлэгийн тусламжинд хоол унд, хувцас, эрүүл ахуйн хэрэгсэл зэрэг байгаа юм. Хүмүүнлэгийн тусламжийг Газын зурвасын иргэдэд Египетээр дамжуулан хүргэж байгаа билээ.

Байлдааны үйл ажиллагааны явц

Израилийн Батлан хамгаалах арми тагнуулын ажиллагааны тусламжтайгаар хуурай замын ажиллагаа явуулж, Газын зурвас дахь ХАМАС хөдөлгөөний гурван ротын командлагчийг устгасан байна. Израилийн цэргийнхэн ХАМАС хөдөлгөөнийхний байрлал, дэд бүтэц рүү цохилт өгөхөд агаарын хүчнийг ашиглан Газын зурваст ажиллагаа явуулсаар байна. Түүнчлэн зэвсэг болон цэргийн техникийг нь илрүүлж байгаа юм.

ЦАХАЛ үүний дараа Рафах дахь байлдааны үйл ажиллагаагаа дөрвөн цаг зогсоожээ. Энэ талаар армийн хэвлэлийн төлөөлөгч Авихай Эдри мэдэгдэж, энэ шийдвэрийг хүмүүнлэгийн зорилгоор гаргасан гэдгийг хэлсэн байна.

Энэ зуур ХАМАС хөдөлгөөний байлдааны нэг жигүүр нь Израилийн цэргийн бааз руу дайрч, “Хезболла” хөдөлгөөний нэг жигүүр нь хил орчмын Биранит дүүрэг дэх Израилийн цэргүүдийн байрлал руу пуужингаар цохилт өгсөн байна. Тус бүлэглэл ЦАХАЛ-ын бас нэгэн казарм, хэд хэдэн цэг болон бусад байрлал руу цохилт өгчээ.

ЦАХАЛ-ын хэвлэлийн бас нэгэн төлөөлөгч Жонатан Конрикус “Израилийн цэргийнхэн Газын зурвасын хойд хэсэг дэх байлдааны ажиллагаагаа дуусгаад ажиллагааны шинэ үе шат руу шилжинэ” гэжээ. Конрикусын хэлж буйгаар ЦАХАЛ-ын Ерөнхий штабын дарга, дэслэгч генерал Герци Халеви үйл ажиллагааны дараагийн үе шатны төлөвлөгөөг баталсан байна.

Конрикус “StandWithUs” байгууллагад ярихдаа ЦАХАЛ-ын зорилго нь ХАМАС-ын бүх дэд бүтцийг устгах явдал гэдгийг хэлжээ. Түүний хэлснээр Израилийн цэргийнхэн газарзүйн хил хязгаарт баригдахгүй гэнэ. Гэхдээ эхний үед байлдааны ажиллагаа Газын зурвасын хойд хэсэгт болжээ. Газын зурваст болсон тулааны үеэр Израилийн цэргүүд олон тоогоор амиа алдсан байна.

НҮБ-ын Ерөнхий нарийн бичгийн даргын байр суурь

НҮБ-ын Ерөнхий нарийн бичгийн дарга Антониу Гутерреш Газын зурвасын нөхцөл байдлаар улс төржсөн байр суурьтай байгаа аж. Тэрбээр хүн ам амьдардаг газрууд руу хийж буй Израилийн цохилтуудыг шүүмжилжээ. НҮБ-ын Ерөнхий нарийн бичгийн даргын шийдвэрийн улс төрийн сэдэл нь Израилийн арми Газын зурвасын суурьшлын бүс рүү увайгүй, ялгаварлан гадуурхсан дайралт хийж, үүний улмаас олон мянган хүүхэд амиа алдсан нь илэрхий болсонд байгаа аж.

Гэхдээ А.Гутерреш энэхүү нөхцөл байдлын тухайд Израилийг зөрчсөн үйлдэл хийж байна гэж мэдээлэх гэж яарахгүй байгаа гэж шинжээчид дүгнэжээ.

Газын зурвасын эрүүл мэндийн тогтолцоо сүйрч байна

Газын зурвасын эрүүл мэндийн тогтолцоо асар хүнд байдалд орсон бөгөөд хүн амд нь зөвхөн эрүүл мэндийн суурь тусламж авах л боломж үлдээд байна гэж Дэлхийн эрүүл мэндийн байгууллагын Онц байдлын хөтөлбөрийн захирал Майкл Райн мэдэгджээ. Райаны хэлснээр, Газын зурваст эрүүл мэндийн дэд бүтэц бүрэн сүйрсний улмаас эрүүл мэндийн тусламжийн зөвхөн наад захын хэрэгцээг л хангах хэмжээнд хүрээд байна.

Газын эмнэлгүүд түлшний хомстолд орж, ус, цахилгаангүй болоод байгаа аж. Зурвасын хойд хэсэг дэх 24 эмнэлгийн 21 нь ажиллагаагүй болсон бол өмнөд хэсгийн 11 эмнэлэг зөвхөн суурь тусламж л үзүүлэх боломжтой болжээ. Мөн Газын зурвас дахь цорын ганц сэтгэцийн эмнэлэг үүдээ бариад байна.