ХЭН ЮУ ХЭЛЭВ | С.Амарсайхан: Хөдөлмөрийн хөлсний доод хэмжээг нэмэх шийдвэр эцэслэгдээгүй

Энэ удаагийн “Хэн юу хэлэв” буланд УИХ-ын гишүүн, Шадар сайд С.Амарсайхан, УИХ-ын гишүүн Х.Болормаа, Хотын дарга Х.Нямбаатар нарын үгийг онцолж байна.

УИХ-ын гишүүн, Шадар сайд С.Амарсайхан: Хөдөлмөрийн хөлсний доод хэмжээ ямар түвшинд байх нь шууд шийдэх асуудал биш. Одоогоор судалгаа тооцоо нь эцэслэгдсэн зүйл байхгүй. Гэр бүл, хөдөлмөр, нийгмийн хамгааллын яам судалгааны ажлууд хийж байгаа. Хөдөлмөрийн хөлсний доод хэмжээг 792 мянган төгрөг болгох талаар хараахан эцэслэгдээгүй байна.

УИХ-ын гишүүн Х.Болормаа: Сүхбаатар дүүрэг улсын хэмжээнд анх удаа орон нутгийн төсвөөр Нэгдсэн эмнэлэг барих ажлыг 2018 онд эхлүүлсэн. Ингээд аравдугаар сарын 7-нд эмнэлгийн үйл ажиллагаа албан ёсоор эхэллээ. Сүхбаатар дүүргийн нэгдсэн эмнэлэг хувьчлагдаад 10 гаруй жил болж байна. Өөрөөр хэлбэл, одоо байгаа эмнэлэг менежментийн хувьчлалд орсон. Ингээд бид 2018 онд нийслэлд төвлөрүүлэх орлогоо 25 тэрбум төгрөгөөр давуулсан бөгөөд давсан орлогоороо 2018 онд нийслэлд томоохон бүтээн байгуулалт хийхээр шийдвэрлэсэн нь Сэлбэ нэгдсэн эмнэлэг юм.

Хотын дарга Х.Нямбаатар: Ингэж балбуулж байхаар өөрийн сонгуулиа бодсон бол энэ жил зам засварын ажлаа хойшлуулах байлаа. Ер нь яаж ч бодсон хувийн ялалтаа бодсон хүн яг сонгуулийн сурталчилгаатай зэрэгцээд зам засвар хийж, иргэдээ бухимдуулаад сууж байх вэ дээ. Үүнийхээ оронд сонгууль өнгөртөл чих амар сууж, өөрийн болоод намынхаа сурталчилгаандаа бүрэн анхаарал хандуулж болох байв. Харин тэгэлгүйгээр хийх ёстой ажлаа амжуулж байгаа нь улаанбаатарчуудаа бодсон хэрэг гэж иргэд хэлж байна. Ер нь манайх шиг улсын нийслэлийн даргыг “Бүдүүн зүрх”-тэй, элдвээр хэлүүлж сурсан хүн л хийнэ.