ХЭН ЮУ ХЭЛЭВ I Гашуунсухайтын төмөр замыг эсэргүүцэх шалтгаан байхгүй

“Хэн юу хэлэв” булангийн энэ удаагийн дугаарт MCS группийн ерөнхийлөгч Ж.Оджаргал, Засгийн газрын Хяналт хэрэгжүүлэх газрын дарга Ч.Өнөрбаяр, Нийслэлийн Засаг дарга асан Д.Сумъяабазар нарын байр суурийг хүргэж байна

MCS группийн ерөнхийлөгч Ж.Оджаргал:

MCS группийн ерөнхийлөгч Ж.Оджаргал  сошиал сүлжээнд үзэл бодлоо илэрхийлэв.

Тэрбээр “Ухаа худгийн төсөл дээр 15, 16 жилийн өмнө Засгийн газрын том ажлын хэсэг гарч, дөрвөн сар хэлэлцээр хийж байж8 тусгай зөвшөөрлөө хуулийн дагуу авсан. Бүх зүйл хууль дүрмийн дагуу явсан. Хууль бусаар аваагүй ээ .Одоогийн үйл ажиллагаа явуулж буй Эрдэнэс Тавантолгой бол бидний төрдөө өгсөн лиценз буюу нийт ордын 96 хувь нь шүү дээ. Хууль журмын дагуу учраас үүн дээр санаа зовохгүй байна. Сонгуульд өгсөн хандивыг ч ярьж байна гэсэн. Жагсаал зохион байгуулж, троллын армитай гэж арай дэндүү гүтгэж байна. Гашуунсухайт-Ганцмод боомтын төмөр замыг эсэргүүцэх шалтгаан байхгүй" гэв.

 Нийслэлийн Засаг дарга асан Д.Сумъяабазар:

-Нийслэлийн нийтийн тээврийн газрын ажил урагшаа явахгүй байна, ажил нь унасан гэж олон хүн хэлж ярьж байсныг жирийн ард иргэд хүртэл шүүмжилж байсан. Тэгээд Ж.Сүхбаатар сайд надад Жавхлантбаатарыг санал болгож, цагдаа хүчний байгууллагад ажиллаж байсан тул хотын замын хөдөлгөөнийг сайн мэдэх хүн тул энэ хүнийг томилж өгөөч гэх саналыг тавьсан. Миний хувьд энэ саналыг нь хүлээн авч, ажил нь сайжрах боловуу гэж Жавхлантбаатарыг томилсон. Би "Тэнүүн-Огоо" компанийн эхний 20 автобус орж ирсэн гэдэг мэдээлэлтэй байсан. Түүнээс биш хүлээн авсан гэдгийг мэдээгүй. Евро 2 хөдөлгүүртэй автобус авсан гэдгийг бүр  ч мэдээгүй. Ямар ч байсан ногоон автобус ирж байгааг сонссон. Ногоон автобус худалдан авах, нийлүүлэх ажилд оролцоогүй.

Засгийн газрын Хяналт хэрэгжүүлэх газрын дарга Ч.Өнөрбаяр:

-Судалгаанд оролцсон төрийн албаны удирдах албан тушаалтнуудын хувьд эрсдэлийн удирдлагыг хэрэгжүүлэх шаардлага байна гэж үзсэн. Мөн манай байгууллага дээр эрсдэлийг хянадаг, төлөвлөдөг юм хангалттай биш байна гэсэн.

Энэ бүгдийг цогцоор нь бий болгох шаардлагатай гэж үзэж байна. Хууль, тогтоол, дүрэм журмаа баталчихдаг, энэ баримт бичгүүдээ хооронд нь хэрхэн уялдуулах вэ, төрийн шийдвэр нь асуудал үүссэний дараа араас нь гал намжаах байдлаар явах бус үүсэхээс нь өмнө, иргэдэд хүндрэл учруулахаас өмнө яаж тооцож даван туулдаг байх вэ, үр дүнг нь хэрхэн  гаргах вэ гэдэг асуудал орхигдож ирсэн байдаг. Шийдэх ёстой асуудал.