Н.Энхбаярыг баривчилсан нь зөв
Намбарын Энхбаяр. Монгол Улсын гурав дахь Ерөнхийлөгч, МАХН-ын дарга энэ эрхэм “Авлигын загалмайлсан эцэг” үү, аль эсвэл ард түмний баатар уу. Экс Ерөнхийлөгчийг баривчилсан үйл явц олон нийтийн дунд ийм асуулт үүсгэв. Харин энэ асуултад Н.Энхбаяр өөрөө хэрхэн хариулсан бол. Тэрбээр Төв аймаг дахь Цагдан хорих газраас ард түмэнд захидал бичжээ. “Би өвөг дээдэс, аав, ээж, хань ижил, эрдэмт багш нарынхаа үргэлж хэлж анхааруулдгийг санагалзан 600 цагдаа сүр үзүүлж, хүчлэн дайрч баривчлах ямар том алдааг гаргасан юм бэ” хэмээн хийсэн алдаагаа олох гэж сууна. Бурхан биш учир алдалгүй яах вэ. Монголчуудын маань амьдрал хүнд хэцүү байгаа цагт “Би алдсан, бас алдсаар байна” гэж гэмших ёстой хүн гэж өөрийгөө боддог. Тийм ч учир дотроо ард түмнээсээ дандаа уучлал гуйдаг билээ” хэмээн тэрхүү захидалд дурьдсан байх юм. Тийм ээ, Н.Энхбаяр бурхан биш. Энэ үнэн. Гэвч “Эрх баригчдын зүгээс надад хүчээр тулгаж байгаа асуудлыг би хийгээгүй юм шүү” гэсэн нь худал сонсогдоод байна. Учир нь тэрбээр Монголын улс төрийн тавцнаа ¹1 “бурхан” байсан. МАХН гэдэг нам хоёрдугаар ээлжийн нөхдийн цуглуулга биш, харин Монгол төрийн бодлогыг тодорхойлдог лидерүүдийн нэгдэл байх үед Н.Энхбаяр эзэн нь байсан. Тиймээс албан тушаал, эрх мэдэл, өнгө мөнгө, энэ бүхний цаана орших авлигын эх сурвалж нь энэ хүн байгаагүй гэдэгт хэн итгэх вэ.
Экс Ерөнхийлөгч “Өргөө” зочид буудал хэмээх хуучин байрны нэгэн орц, “Улаанбаатар таймс” сонин гэж нурсан байшинг би хууль бусаар хувьдаа аваагүй. Тэр байшинг би нураалгаагүй, нураах байсныг нь ч мэдээгүй” гэжээ.
Харин АТГ-ынхан түүнийг баривчлах болсон үндэслэлээ ингэж тайлбарласан юм. “Улсын мөрдөн байцаах газар болон АТГ-ын эдийн засгийн гэмт хэрэгтэй тэмцэх албанаас хамтарсан мөрдөн байцаах хэсэг байгуулан ажиллаж байна. “Хар дун” компанид тухайн үед 605 сая төгрөгөөр үнэлэгдсэн “Өргөө” зочид буудлын 75 хувийг эзэмшүүлэхээр шийджээ. Энэ шийдвэрийн дагуу тухайн объектийг 137 сая төгрөгөөр үнэгүйдүүлсэн. “Хар дун” компанийн захирал Б.Хуягийн төрсөн дүү нь Н.Энхбаярыг Ерөнхийлөгч байхад шадар туслах нь байсан Б.Тулга юм. “Өргөө” зочид буудлын 75 хувийг эзэмшсэний дараа “Ремиф” компанийн захирал Э.Батшугар тушаал гаргаж, охин компаниа болгосон. “Улаанбаатар таймс” сонины менежментийн хувьчлалыг ч мөн адил хууль бус хийсэн. Тухайн үед нийслэлийн өмчит үйлдвэрийн газрыг менежментийн багт дахин үнэлгээ хийхгүйгээр гэрээнд заасанчлан 369.7 сая төгрөгөөр худалдахаар шийдвэрлэсэн. Үнэн хэрэгтээ энэ объект 2.1 тэрбум төгрөгийн үнэтэй байв. Гэвч 1.7 тэрбум төгрөгөөр үнэгүйдүүлж, анхны үнэлгээг нь 369.7 сая төгрөгөөр тогтоосон. Нийслэлийн өмчийг ийн завшсан байна” гэж. Н.Энхбаярын хэлсэнчлэн хууль сахиулагчид нурсан байшин, бас хэзээ мөдгүй нурах гэж байгаа хуучин байшингаар шалтаглан түүнийг баривчилсан юм байх. Харин “Улаанбаатар таймс” сониныг хувьчлан авах нэрийдлээр хотын А зэрэглэлийн газрыг өөрийн болгохыг санаархсан нь худлаа гэж үү. Байшингийн орцыг хууль бусаар эзэмших нь байтугай оймс хулгайлсан нөхөр ч хуулийн өмнө хариуцлага хүлээдэг юм шүү. Н.Энхбаярыг эзэн байх үед эрх мэдэлтнүүд хууль завхруулж, энгийн иргэн гар утас хулгайлсныхаа төлөө төрийн хуулиар шийтгүүлж л байсан. Харин одоо Н.Энхбаяр эзэн биш, иргэн болчихоор хулгай хийсэн хүнд хууль үйлчилдэггүй болох хэрэг үү. Тиймээс экс Ерөнхийлөгч өө, та яг одоо хамт хоригдож байгаа хүмүүсээсээ заавал асуугаарай. “Намайг Монгол Улсын Ерөнхийлөгч байхад та гэмт хэрэг хийсний улмаас ял шийтгэл сонсож байсан уу. Аль эсвэл хилс хэрэг хүлээж байв уу. Тэр үед хулгай, луйвар хийсэн нөхдөд төр төмөр нударгаа хэрхэн үзүүлж байсан бэ” гэж. Магадгүй, таныг хаан байхад хилс хэрэгт холбогдож, нэр хүнд, эд хөрөнгө, аж амьдралаараа хохирсон хүмүүс ч тэдний дунд байж мэднэ. Халаасны хулгай хийснийхээ төлөөсөнд олон жилийн ял сонссон нэгэн байхыг ч үгүйсгэмгүй. Харин иргэн Н.Энхбаяр, иргэн Дорж хоёрт маш том ялгаа бий. Н.Энхбаяр эзний сэнтийгээс буусан ч эрх мэдэлтэй, эд хөрөнгөтэй, бүхэл бүтэн намтай, бас жижиг намуудын нэгдэл буюу улс төрийн холбоотой хүн. Харин хорихын хүйтэн өрөөнд хоног өдрийг өнгөрүүлж буй иргэн Доржид нам байтугай хэн ч байхгүй байх шүү. Гэвч иргэн Н.Энхбаяр, иргэн Дорж хоёр нэг л зүйлээрээ ижилхэн. Хууль бус үйлдэл хийсэн л бол тэд хуулийн өмнө хариуцлага хүлээх жамтай. Тиймээс экс Ерөнхийлөгчийг баривчилсан нь зөв. Хэрэг хийсэн бол гэмээ хүлээж, эс бөгөөс “Авлигын загалмайлсан эцэг” хэмээх “цол”-ыг хууль ёсоор үгүй хийх боломж түүнд гарч ирлээ. Гэхдээ үүнийг түмний хийрхэл биш, төрийн хуулиар тогтооно гэдэгт найдъя.
"Улс төрийн тойм" сонин
Холбоотой мэдээ
Сэтгэгдэл ( 0 )