Бүх ард түмний спортын их наадамд түрүүлсэн зэвсэгт хүчний ”Алдар” спорт хорооны тамирчдад хүндэтгэл үзүүлэв

 Батлан хамгаалах салбар, Зэвсэгт хүчнийхээ нэр алдрыг өндөрт өргөн содон амжилт гаргаж “Монголын бага олимп” гэгддэг Бүх ард түмний спортын XIII их наадамд түрүүлж, аварга спорт хороогоор тодорсон “Алдар” спорт хорооны нийт баг тамирчид, удирдлага болон БХЯ, ЗХЖШ-аас томилогдсон багийн дарга, дасгалжуулагч нарт хүндэтгэл үзүүлэх ёслолд БХЯ-ны Төрийн нарийн бичгийн дарга, дэслэгч генерал Ц.Тогоо, ЗХЖШ-ын дарга, дэслэгч генерал Ц.Бямбажав, Биеийн тамир, спортын газрын дарга Ч.Наранбаатар болон БХЯ, ЗХЖШ-ын удирдлага оролцлоо.

    Амжилт гаргасан тамирчдыг БХЯ, ЗХЖШ, БТСГ-ын шагналаар шагнаж урамшуулав. Мөн “Зэвсэгт хүчин-олимп” сангаас “Лондон-2012” олимпид Зэвсэгт хүчнээ төлөөлөн оролцох Хөдөлмөрийн баатар, гавьяат тамирчин, хошууч О.Гүндэгмаа, ОУХМ дэд ахлагч Д.Баяраа, Г.Жавзмаа нарын бэлтгэлд зориулж тус бүр 20 сая төгрөг олголоо.

    Монголын Бүх ард түмний спортын XIII их наадамд нийслэлийн 9 дүүрэг, 21 аймаг, яам, тусгай газрын 6 спорт хороо гээд нийт 36 байгууллагын 5000 гаруй тамирчин 1350 багц медалийн төлөө 120 хоногийн турш өрсөлдсөн бөгөөд Монгол Улсын гавьяат тамирчин, даян аварга, хурандаа Г.Өсөхбаяр даргатай Зэвсэгт хүчний “Алдар” спорт хороо 11 дэхь удаагаа тасралтгүй түрүүлж, Монгол Улсын шилдэгийн шилдэг манлай спорт хороо гэдгээ дахин батлан харуулав.

   Зэвсэгт хүчний “Алдар” спорт хорооны 300 гаруй тамирчин энэ спортын их наадмын 23 төрөлд өрсөлдөн нийт 88 алтан медаль,  73 мөнгөн медаль, 60 хүрэл медаль хүртэж,  байгууллагын дүнгээр буудлага, дугуй, кикбокс, тэшүүр, цана, гимнастик, сагсан бөмбөг, самбо бөх, хөнгөн атлетик зэрэг 9 төрөлд 1-р байр, мото спорт, байт харваа, бокс, хүндийг өргөлт, чөлөөт бөх, олс таталт, софт теннис зэрэг 8 төрөлд 2-р байр, жудо бөхөд 3-р байр эзэллээ.

Түүнчлэн Монгол Улсын рекорд амжилтыг 9 тамирчин шинэчлэн тогтоож, спортын мастер 10, спортын дэд мастер 15 шинээр төрж, тэшүүрийн тамирчин ОУХМ Д.Дэлгэрмаа уралдсан зай бүртээ рекорд амжилт шинэчлэн тогтоож 5 алтан медаль, цанын тамирчин ОУХМ Ч.Отгонцэцэг 4 алтан медаль, хөнгөн атлетикийн тамирчин, ахлах дэслэгч П.Маамуу, Г.Одхүү нар 2 алтан медаль хүртсэн бахдам амжилт гаргалаа.

       БХЯ-ны Хэвлэл мэдээлэл, олон нийттэй харилцах алба