Д.Ганболд: Бүрэн эрхийн хугацаанд иргэдийн тав тухтай, аюулгүй орчныг бүрдүүлэх нь бидний үүрэг

Чингэлтэй дүүргийн 17 дугаар тойрогт НИТХ-ын сонгуульд МАН-аас нэр дэвшигч Даваагийн Ганболдтой ярилцлаа.

-          Таны ямар давуу байдал энэ тойрогт нэр дэвшихэд нөлөөлөв. Мөрийн хөтөлбөрөө хэрэгжүүлэхэд таньд ямар давуу тал байна вэ?

-          Намайг дүүргийн засаг даргаар томилогдоод ирэхэд, иргэд маань та ямар Чингэлтэйг мэдэхгүй биш санаж бодсоноо ажил болгоорой. Бид дэмжинэ шүү гэсэн. Би үнэхээр баярласан. Сүүлийн дөрвөн жил олон түмнийхээ төлөө чадах чинээгээрээ зүтгэж ажиллалаа. Иргэд маань улам дэмжиж байгаа. Цаашид ч хичээнэ. 1992 оноос хойш миний амьдрал энэ дүүрэгтэй холбогдож сайн сайхан явж байна даа.

-          Дүүргийнхээ тулгамдсан асуудлуудыг шийдэх ямар арга зам байна вэ?

-          Дахин төлөвлөлтийн хүрээнд шинээр эко цэцэрлэг байгуулах газруудыг чөлөөлж хиймэл нуур бүхий цэцэрлэгт хүрээлэн байгуулна. Гэр хорооллын барилгажилт, дэд бүтцийг шийднэ.

Гэр хороолол руу инженерийн шугам сүлжээг тавих ажлыг манай дүүрэг анх удаа эхлүүлсэн, үүнийгээ үргэлжлүүлнэ.

Хотын дахин төлөвлөлтийн хүрээнд инженерийн шугам сүлжээг хонгилын системд үе шаттайгаар шилжүүлэх замаар ил задгай авто зогсоол, грашуудыг цэгцлэн барилгажилтын орчныг иж бүрэн цогцоор нь эко орчны хамт шийдэх асуудлыг эхлүүлсэн нь Засаг даргаар ажилласан хугацаандаа хийсэн чухал шийдлийн нэг болсон. Энэ ажлынхаа үр дүнг харна гэж бодож байна.

-          ИТХ-д та хамгийн түрүүнд ямар асуудал оруулж шийдүүлэх вэ?

-          Гэмт хэрэг, архидан согтуурах нийгмийн хэв журам зөрчихийн эсрэг телекамерийн системийг Улаанбаатар хотын хэмжээнд үргэлжлүүлэн иж бүрэн хэрэгжүүлэх асуудлыг оруулна. Манай зарим гэр хорооллыг камержуулсан нь үр дүнгээ өгч иргэд талархаж байгаа.

-          Таны сонгогчиддоо ам бардам амлаж чадах гурван зүйл юу вэ?

-          Бүрэн эрхийн хугацаанд иргэдийн тав тухтай, тохилог, аюулгүй орчныг бүрдүүлнэ.

-          Сая хүнтэй их хотын хөгжилд танай тойргийнхон ямар байдлаар үлгэрлэх ёстой вэ, танай дүүрэгт ямар давуу тал байна вэ?

-          Хотын соёлд хамтдаа суралцах нь таньд ч надад ч хамаатай. Хот өөрөө бидний гэр, бид нэг гэр бүлийнхэн. Тийм болохоор гэр маань цэвэр, цэмцгэр, аюулгүй, гэдэс цатгалан байх нь биднээс л шалтгаална. Манай дүүргийнхэн угаасаа их хотын соёлд, иргэншилд манлайлагчид тэр утгаараа хамтдаа хотоо хөгжүүлнэ гэдэгт нь би итгэдэг. Манай дүүргийнхэн идэвхи, санаачлага ихтэй, байнга л ингэмээр тэгмээр байна гэж байдагт нь баярладаг.