Шүүх хурал хойшлогдлоо
С.Зориг агсны хэргийн шүүх хурал өнөөдөр ШШГЕГ-ын харьяа цагдан хорих 461 дүгээр ангид 10.00 цагаас болох гэж байгаа талаар өмнө нь мэдээлсэн. Одоогийн байдлаар ШШГЕГ-ын харьяа цагдан хорих 461 дүгээр анги руу ордог зам дээр буюу ДЦС4-ийн уулзвар дээр цагдаагийн хамгаалалт гарчээ. Мөн шүүх хурлын үеэр тус хорих ангид сүлжээ унагагч байрлуулсан юм байна. Яг одоогийн байдлаар сэтгүүлчдийг бүртгэж эхэлж байна. Хуралд Ерөнхий шүүгч М.Алдар, шүүгч Б.Мөнх-Эрдэнэ, С.Оюунчимэг нар оролцоно. Харин өмгөөлөгчөөр Л.Мөнхтөр, С.Оюунцэцэг, Д.Дашдорж, Л.Энхсайхан, улсын яллагчаар Б.Батжаргал, Ж.Сандагсүрэн, хохирогчоор С.Оюун оролцох юм.
Харин яллагдагчаар Ц.Амгаланбаатар, Т.Чимгээ, Б.Содномдаржаа нарыг Эрүүгийн хуулийн тусгай ангийн 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.16 гэсэн зүйл заалтаар шүүнэ. Тодруулбал,
91 дүгээр зүйл. Хүнийг санаатай алах
91.1.Энэ хуулийн 91.2-т заасан хүндрүүлэх нөхцөл байдалгүйгээр хүнийг санаатай алсан бол арваас дээш арван таван жил хүртэл хугацаагаар хорих ял шийтгэнэ.
91.2.Хүнийг:
91.2.1.шунахайн сэдэлтээр;
91.2.4 захиалгаар;
91.2.6.өөр гэмт хэргийг нуун далдлах буюу хялбарчлах зорилгоор;
91.2.10.хүнийг санаатай алах гэмт хэргийг давтан үйлдсэн /энэ хуулийн 93 дугаар зүйл хамаарахгүй/;
91.2.11.бүлэглэж, урьдчилан үгсэж тохиролцсон бүлэг, зохион байгуулалттай бүлэг, гэмт бүлэглэл;
91.2.12.онц харгис хэрцгий аргаар;
91.2.13.нийтэд аюултай аргаар
91.2.16.хоёр ба түүнээс олон хүнийг гэсэн зүйл заалтаар шүүгдэх юм.
Албан бус эх сурвалжийн мэдээлж буйгаар энэ удаагийн шүүх хурал хойшилж магадгүй гэнэ. Учир нь яллагдагчдын талаас хойшлуулах хүсэлтийг шүүх хуралд тавьсан талаар мэдээлээд байгаа юм. Шүүх хурал хойшилж магадгүй гэсэн дээрх мэдээлэл батлагдаж, 12.54 цагийн үед "Шүүх хурал" долоо хоногийн хугацаатай хойшлох болсныг албан ёсоор мэдэгдлээ.
С.Баяр
Холбоотой мэдээ
Сэтгэгдэл ( 1 )
Хамгийн энгийн логик -төлөвлөсөн аллага үйлдэж байгаа нөхдүүд гэрт нь зохион байгуулахаар сонголт хийх болов уу, цаг хугацаанд хавчигдсан нөхдүүд л ийм юм хийнэ дээ, маргааш нь юу болох ёстой байлаа, эсвэл ахуйн, тэр тусмаа гэр бүлийн /гардуулсан/ асуудал арай биш биз дээ. Нөгөө монгол сэтгэхүйгээр нэг ”мундаг” мөрдөгч сандал ширээгээ сайжруулах гэж байна уу, гэхдээ мэдээж саарал байшингийн удирдлагаар ....