”Дэлхийн эдийн засгийн форум”-д “Unread Media”-г үүсгэн байгуулагч А.Ундрал оролцоно

“Дэлхийн хамгийн хүчирхэг хүмүүс нэг дор цуглардаг" Дэлхийн эдийн засгийн форум"-д эх орноо төлөөлөн www.unread.com сайтыг үндэслэгчдийн нэг, сэтгүүлч А.Ундрал оролцохоор болжээ. 

Тус арга хэмжээнд  дэлхийн улс орнуудын ерөнхийлөгчид, төр засгийн тэргүүнүүд, салбартаа манлайлж яваа тэрбумтнууд, гүйцэтгэх захирлууд, үүсгэн байгуулагчид, энтрепренерүүд, нийгмийн зүтгэлтнүүд цуглаж, дэлхий нийтийн өмнө тулгамдаж буй томоохон асуудлуудыг хэлэлцэн, хамтын ажиллагааны санал санаачлагуудыг солилцон хуралддаг юм.

Энэ жилийн чуулган Швейцарь улсын Давос хотноо энэ сарын 17-20ны өдрүүдэд  “Эргэх холбоотой хариуцлагатай манлайлал” сэдвийн хүрээнд явагдах  аж.

Тус эдийн засгийн хуралд Microsoft-ийн Bill Gates, С.Наделла, Google-ийн Э.Шмидт, Facebook-ийн Sheryl Sandberg-аас эхлээд Wikipedia-ийн Ж.Уэльс, Olympic-ийн Т.Бах, Alibaba.com -ийн Жак Ма нар оролцох аж.

Харин Монголоос албан ёсны оролцогчдын жагсаалтанд Ерөнхийлөгч Ц.Элбэгдоржийн хамтаар А.Ундрал оролцох юм.  

А.Ундрал энэ тухай "Үнэнийг хэлэхэд дэлхий даяар 4000 гаруй шэйпэрүүдтэй өрсөлдөн, ширүүн өрсөлдөөн дундаас сонгогдсон 50 оролцогчийн нэг болсон гэдгээ дуулсан 11-р сараас хойш одоог хүртэл баярласан, гайхсан, бахархсан бас айсан, сандарсан сэтгэгдэл минь арилаагүй хэвээр л байна. Давосын уулзалтанд оролцоно гэдэг миний хувьд “олимпийн наадамд” оролцож байгаатай утга нэгэн үйл явдал юм. Том арга хэмжээний “дарамт” гэж үнэхээр байдаг юм байна шүү. Дөрөвхөн өдрийн дотор 400 гаруй хуралдаан, 100 гаруй үдэшлэг зэрэг болдог энэ нүсэр арга хэмжээнд би энтрепренершип, инноваци, технологи болон дижитал медиа гэсэн чиглэлийн хүрээнд сонгогдсон оролцогчийн хувьд аль болох сонирхолтой, үр дүнтэй, хэрэгтэй зүйлс сонсон, хэрэгтэй хүмүүстэй танилцахыг хүсэн хуваариа гаргаж сууна. Ховор тохиох ийм том боломжийг дэмий “ангайсаар” өнгөрөөчихвий гэсэндээ хэрэндээ л биеэ бэлдэж, мэдээнээс л нэрийг нь хардаг хэд хэдэн мундаг хүмүүстэй уулзалт товлочихоод хүлээж байна даа. Олон боломжууд нээгдэх байх аа. Аз, амжилт хүсээрэй" хэмээн өөрийн нүүр хуудаснаа бичжээ. 

Б.Алтжин