Хятад цахилгаан бараа “Тошиба”-гийн шошготой зарагдана

Японы гэр ахуйн цахилгаан хэрэгсэл үйлдвэрлэгч “Тошиба” корпорацийн гэр ахуйн салбар компани хятадуудын мэдэлд шилжлээ.  Урд хөршийн  гэр ахуйн цахилгаан хэрэгслийн “Midea Group” компани Тошибагийн салбар болох “Toshiba Lifestyle Products & Services Corporation”-ы 80.1 хувийг 473 сая ам.доллараар худалдаж авчээ.

Ингэснээр “Midea Group”-ын үйлдвэрлэсэн хөргөгч, угаалгын машин, тоос сорогч болон бусад жижиг төхөөрөмжүүд “Тошиба” гэсэн брэнд нэрийн дор худалдаалагдах боломж нээгдэж байгаа юм. Компанийн 19.9 хувь нь “Тошиба” корпорацийн эзэмшилд үлдэх ч “Toshiba” брэнд нэрийг 40 жил дэлхий дахинд ашиглах эрх, 5,000 гаруй оюуны өмчийн патентаа Хятадын талд шилжүүлж өгч байгаа ажээ. Хятадууд компанийн нэг ч ажилтныг халахгүй гэсэн амлалт өгснөөс үзэхэд тэдэнд брэнд нэр л хамгийн чухал байсан бололтой. “Midea Group” нь 1968 онд Хятадын Гуандунь мужид байгуулагдсан, дэлхий даяар 200 салбар компани, 100,000 ажилтантай гэнэ. Өнгөрсөн жил 21 тэрбум ам.долларын орлого олжээ.

С.Төгөлдөр