”Мэргэжлийн” Засгийн газрын цагаа олсон ганц шийдвэр

Хөдөлмөр, нийгмийн хамгааллын сайд Н.Номтойбаяр  өнгөрсөн арваннэгдүгээр сард "Тэтгэвэрийн зээлийн хүүг үе шаттайгаар бууруулна" хэмээн мэдэгдэж байсан билээ. Тэгвэл үүний дагуу ахмад настны тэтгэврийн зээлийн хүү жилийн 18 хувийн хүүтэй байсныг 15 хувь болгож бууруулах шийдвэр өнөөдрөөс  хэрэгжиж эхэллээ. Ахмадууд сар шинийн бэлтгэлээ базаахаар тэтгэврийн зээл авах нь нэмэгддэг энэ үед цагаа олсон шийдвэр болов.

Ингэхдээ өнөөдрийн байдлаар, Хаан болон Төрийн банкаар дамжуулан тэтгэвэр авагчдад  15 хувийн хүүтэй зээл авах бололцоо нээгдэж байгаа юм.

Учир нь тэтгэвэр авагч өөрөө банкаа сонгодог болсонтой холбогдон  нийт 378 мянга орчим тэтгэвэр авагч байгаагийн 91 хувь нь Төрийн банк, “ХААН” банкаар үйлчлүүлдэг аж. Өөрөөр хэлбэл аль банк нийт тэтгэвэр авагчдын хэдэн хувьд үйлчилж байна,  үүний дагуу Банкны тухай хуулийн 9.1 дүгээр зүйлийг удирдлага болгоод Нийгмийн даатгалын сангийн чөлөөт мөнгөн үлдэгдлийг тухайн зээлийн эргэлт, зээлийн багцтай нь уялдуулж байршуулдаг. Энэ дагуу Төрийн банк, “ХААН” банканд 45 тэрбум төгрөг байршуулжээ.

Ингэхдээ богино хугацаат буюу 6 сар хүртэлх зээлийн хүүг л бууруулсан бөгөөд урт хугацааны зээлийг банкны хүүгээр олгох юм байна. Харин өмнө зээлээ авчихсан иргэд зээлээ төлж дууссаны дараа 15 хувийн зээлийн хүү рүү шилжих боломж бүрдэх юм.

Тэтгэврийн зээлийн хүүг гурван хувиар ийн бууруулсан нь зөвхөн эхлэл бөгөөд ХНХЯ-наас цаашид хүү бууруулах асуудлаар шат дараалсан ажил хэрэгжүүлэхээр төлөвлөжээ. Мөн цаашид бага хүүтэй зээлийг бусад арилжааны банкуудаар дамжуулан авах боломжийг судлаж байгаагаа Хөдөлмөр, нийгмийн хамгааллын сайд Н.Номтойбаяр өнөөдөр мэдээлэл хийх үеэрээ онцоллоо.  

Засгийн газрын дээрх шийдвэр бодит байдалд хэрэгжиж байгаа эсэхийг  тодруулахаар,  манай сурвалжлах баг Төрийн банкийг зорьсон юм.

Энэ  талаар тус банкны мэдээллийн ажилтнаас тодруулахад "Манай банк Хөдөлмөр, нийгмийн хамгааллын яам, Эрүүл мэнд, Нийгмийн даатгалын Ерөнхий газартай хамтран хэрэгжүүлж буй хөнгөлөлттэй нөхцөл бүхий тэтгэврийн зээлийг өнөөдрөөс эхлэн Монгол орны өнцөг булан бүрт байрлах өөрийн 540 салбар нэгжээрээ дамжуулан  олгож эхэллээ. Энэхүү хөнгөлөлттэй нөхцөл бүхий тэтгэврийн зээл нь богино  буюу 6 хүртэл сарын хугацаатай, жилийн 15.0% буюу сарын 1,25%-ийн хүүтэй. Та Төрийн банкаар дамжуулан тэтгэврээ авдаг, энгийн тэтгэврийн зээлийн үлдэгдэлгүй бол энэхүү зээлийг авах боломжтой.

Харин урт хугацаатай буюу 7 сар болон түүнээс дээш хугацаагаар тэтгэврийн зээл авах бол банкны үндсэн нөхцөл болох жилийн 18.0% буюу сарын 1.5%-ийн хүүтэй олгоно. Хөнгөлөлттэй нөхцөл бүхий тэтгэврийн зээл олгох хөтөлбөр цаашид тогтвортой үргэлжлэх тул та өөрийн хүссэн үедээ тэтгэвэр авдаг Төрийн банкны салбарт хандан зээлээ аваарай" гэв.

Хаан банкны тухайд Засгийн газрын дээрх шийдвэр мөн л хэрэгжиж эхэсэн байна. Ахмад настны тэтгэврийн зээлийн хүү буурсантай холбогдуулан Хаан банк, Төрийн банк нэлээдгүй ачаалалтай ажиллаж байлаа.  Энэ үеэр ахмадын байр суурийг асуулаа.

Ахмад настан Б.Норов

"Сар шинийн баяр дөхөхөөр ахмадууд бид тэтгэврийн зээлээ л авдаг. Тэгвэл өнөөдрөөс тэтгэврийн зээлийн хүүг гурван хувиар ч болтуай бууруулж, бидний амьдралд тус болох шийдвэр гаргаж байгаад баяртай байна. Цагаан сарын тавгын ширээ, ууц, бэлэг сэлт авахын тулд дор хаяж зургаан сарын тэтгэврийн зээл авдаг” гэв.

Ахмад настан Н.Дашсүрэн

"Тэтгэвэр буурсан тухай мэдээ сонсоод эмээ нь зээл авах гээд хүрээд ирлээ. Цагаан сар дөхөж байгаа учраас бидний ихэнх л тэтгэврийн зээл авч  шинэ сараа угтдаг. Зээлийн хүү буурсан учраас баяр дөхөх тусам банкны очер нэмэгдэнэ гэж бодоод зээлээ эрт авч байгаа юм” гэлээ.

Мэргэжлийн засгийн газар байгуулагдсанаас хойшхи авч хэрэгжүүлж буй томоохон ажил нь магадгүй тэтгэврийн зээлийн хүүг бууруулсан энэхүү шийдвэр болов. Ахмадын хувьд намар сургууль эхлэх болон цагаан сарын үеэр тэтгэврийн зээл авах нь илүүтэй нэмэгддэг билээ.

Дашрамд хэлэхэд, улсын хэмжээнд тэтгэвэр дахин тогтоох аян энэ долоо хоногт эхэлсэн тул  иргэд тэтгэврээ үнэн, зөв тогтоолгосон эсэхээ нягтлуулахын тулд харьяа газрын Эрүүл мэнд, нийгмийн даатгалын газар, хэлтэсүүддээ очихыг зөвлөе.

Б.Алтжин