Дараагийн шалгагдах эрхэм Монголбанкны ерөнхийлөгч асан Н.Золжаргал гэв үү

 УИХ-ын Эдийн засгийн байнгын хорооноос Монголбанкны 2012-2016 оны үйл ажиллагааг шалгах ажлын хэсэг байгуулжээ. Ажлын хэсэгт УИХ-ын гишүүн Т.Аюурсайхан, Ц.Даваасүрэн, М.Оюунчимэг, Ж.Бат-Эрдэнэ, С.Чинзориг, Х.Болорчулуун нар багтсан байна. Ажлын хэсгийн шалгалт өчигдөр эхэлж ирэх сарын 30-ныг хүртэл үргэлжлэх ажээ. Шалгалтаар үндэсний мөнгөн тэмдэгтийн ханшийн тогтвортой байдлыг хангах, “Үнэ тогтворжуулах хөтөлбөр”-өөс эхлээд санхүүжүүлсэн төсөл, арга хэмжээний үр дүн, хэвлэсэн мөнгөний хэмжээ гээд хэд хэдэн чиглэлд хяналт шалгалт хийхээр болжээ.

Монголбанкны 2012-2016 оны үйл ажиллагааг шалгана гэдэг нь тэр үед захирлаар нь ажиллаж байсан Н.Золжаргалтай холбогдож байна гэсэн үг юм. Энэ үед Монголбанкны удирдлагад байсан хүмүүс хоёр ч томоохон асуудалд буруутгагдаж мэдэхээр байна.

Хөгжлийн банкнаас гаргасан “Чингис”, “Самурай” бондын зарцуулалтад Монголбанк хяналт, шалгалт тавьж ажиллах ёстой гол субект юм. Энэ үүднээсээ их хэмжээний алдагдалд орсон Хөгжлийн банкны үйл ажиллагаа, чанаргүй зээл олголт, тендергүйгээр ажил гүйцэтгүүлсэн төсөл хөтөлбөрт мөнгө зарцуулсан зөрчлүүдийг хяналт тавьж ажлаагүй гэдэгт Монголбанкны удирлагууд буруудаж магадгүй байна. Хөгжлийн банкны төсөл хөтөлбөртэй холбоотойгоор тус банкны гүйцэтгэх захирал Н.Мөнхбат, УИХ-ын гишүүн асан Н.Батбаяр, Б.Гарамгайбаатар нарыг шалгаж эхлээд буй.

 Нөгөө асуудал нь “Эрдэнэт” үйлдвэрийн 49 хувийг Худалдаа хөгжлийн банкинд шилжүүлэх үйл явцад Монголбанк буруутгагдаж байна. Тодруулбал, “Эрдэнэт”-ийн 49 хувийг төрийн мэдэлд авах тухай УИХ-ын тогтоолд “хууль тогтоомж удаа дараа зөрчсөн” Монголбанк, Засгийн газрын удирдлагуудыг шалгах ёстой гэсэн чиглэл ч бий. "Эрдэнэт"-ийн 49 хувийг худалдаж авсан хөрөнгийн эх үүсвэр хууль ёсны байсан эсэхийг тогтоох юм. Худалдаа хөгжлийн банкны “Эрдэнэт”-ийн 49 хувийг худалдаж авсан хөрөнгө нь Хөгжлийн банкны бондын мөнгө байсан, үүнд баталгаа гаргасан, зөвшөөрөл өгсөн эрхэм нь Монголбанкны ерөнхийлөгчөөр ажиллаж байсан Н.Золжаргалыг гэж УИХ-ын зарим гишүүд үзэж байгаа. Иймд Монголбанкны үйл ажиллагааг шалгах нэг үндэслэл болж байгаа юм байна. Монголбанкийг УИХ-аас гарсан ажлын хэсгийнхэн шалгахаас гадна хуулийн байгууллагынхан ч “овоо хараа”-ндаа авсан мэдээлэл байна. “Эрдэнэт” үйлдвэрийн 49 хувийг төрд хууль бус шилжүүлсэн гэж үзэн цагдаагийн байгууллага ажлын хэсэг гарган шалгаж буй. Ажлын хэсгийнхэн Монголбанкийг ч шалгаж эхэлсэн мэдээлэл байна. Иймд Монголбанкны өнгөрсөн дөрвөн жилийн үйл ажиллагааг УИХ-ын гишүүд болоод хуулийнхан тус тусдаа шалгаж эхэллээ.

Энэ асуудалтай холбоотойгоор Монголбанкны ерөнхийлөгчөөс гадна тухайн үед Сангийн сайдаар ажиллаж байсан Б.Болор, Ерөнхий сайд асан Ч.Сайханбилэг нар ч буруудаж мэдэхээр байгаа юм. Ямартай ч “фортуна” Н.Батбаяр, Б.Гарамгайбаатар нарын араас Монголбанкны ерөнхийлөгч асан Н.Золжаргал шалгагдах бололтой.

 Т.Түвшин