Эрдэнэт-Овоот чиглэлийн төмөр замыг санхүүжүүлэх гэрээг үзэглэв

Коксжих нүүрсний нөөцөөрөө хоёрдугаарт ордог Овоотын ордыг эзэмшигч “Aspire mining” компани Овоот-Эрдэнэт чиглэлийн 549 км төмөр замын барилгын ажлыг санхүүжүүлэх албан бус гэрээг БНХАУ-ын “China Gezhouba Group Co Ltd” компанитай байгууллаа. Гэрээнд “Aspire mining”-ийг төлөөлөж охин компани болох “Northern Railways” гарын үсэг зурсан байна. Төмөр зам баригдаж ашиглалтад орвол нөөцөөрөө Тавантолгойн дараа орох коксжих нүүрсний том ордоо бүрэн хүчин чадлаар ашиглах боломжтой болох юм. 

“Northern Railways”-ийнхан төмөр замын барилгын ажлын гүйцэтгэгчээр “China Railway Construction Corp.”, “China Railway 20 Bureau”, “China First First Research & Design Institute” зэрэг байгууллагуудыг ажиллуулахаар яриа хэлэлцээр хийж байгаа юм байна. Мөн санхүүжилтийн ажилд “China Gezhouba Group Co Ltd”-аас гадна “China Energy Engineering Corp” оролцох ажээ.    

“Aspire mining”-ийн захирал Дэвид Пауэлл энэ талаар хийсэн мэдээлэлдээ “China Gezhouba Group Co Ltd” бол дэлхийн олон улс оронд томоохон төслүүдийг санхүүжүүлж байсан туршлагатай компани юм” хэмээн хэлсэн байна. 

Б.Цогт-Ирээдүй