Энэ оны ургацаас 230 мянган тонн буудайг гурилын үйлдвэрүүдэд нийлүүлжээ

Э.Тэргэл | Zindaa.mn
2018 оны 11 сарын 14

Хүнс, хөдөө аж ахуй, хөнгөн үйлдвэрийн яамнаас 2018 оны ургац хураалтын нэгдсэн дүнг Засгийн газарт танилцуулахаар ажиллаж байна. Аймаг, нийслэлээс ирүүлж буй мэдээг нэгтгэж, арваннэгдүгээр сарын 20-н гэхэд энэ жил ургацын урьдчилсан балансаар тогтоосон ургацаа хураан авсан уу, өмнөх оноос хэдэн хувиар өссөн нь тодорхой болно.

2018 оны аравдугаар сарын 29-ний байдлаар ургац хураалтын ажил дуусч, урьдчилсан дүнгээр 409,6 мянган тонн үр тариа, 160,9 мянган тонн төмс, 93,6 мянган тонн хүнсний ногоо, 93,6 мянган тонн хүнсний ногоо, 117,8 мянган тонн тэжээл, 19,3 мянган тонн тосны ургамал тус тус хураан авсан тухай бид өмнө мэдээлсэн. Энэ нь өмнөх оны мөн үетэй харьцуулахад үр тариа 172,6 мянган тонноор, төмс 44,5 мянган тонноор, хүнсний ногоо 14,5 мянган тонноор, тэжээл 57,3 мянган тонноор, тосны ургамал 7,2 мянган тонноор тус тус өссөн үзүүлэлт юм.

Одоогийн байдлаар энэ оны ургацаас гурилын үйлдвэрүүдэд 230 мянган тонн буудай нийлүүлээд байна. 2017 онд 118 мянган тонн буудайг гурилын үйлдвэрүүдэд нийлүүлж байжээ.

Эх сурвалж: ХХААХҮЯ

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top