Дэлхийн шилдэг балетчид Монголд тоглоно

Монголын Балетын Хөгжил Сан “Night Of Ballet” фестивалийг Монгол улсад анх удаагаа , МУГЖ, ДБЭТ болон АНУ-н Бостон балет, Японы Комаки Балет компанийн гоцлол бүжигчин  Д.Алтанхуягийн удирдлагаар ирэх сарын 19-25 ны өдрүүдэд зохион байгуулах гэж байна. Монгол Улсын Ерөнхийлөгчийн ивээл дор болох уг тоглолт хоёр хэсгээс бүрдэх бөгөөд  дэлхийд ур чадвараараа гайхагдсан шилдэг балетчидыг урьжээ.

 Зургадугаар сарын 19-ны өдөр ДБЭТ-ын тайзнаа “Хунт нуур” бүжгэн жүжгийн тоглолтоор фестиваль эхэлнэ. Хунт нуур” бүжгэн жүжгийн гол дүр болох ханхүү Зигфридийн дүрд МУГЖ, Д.Алтанхуяг, Одетта буюу Цагаан хунд Япон улсын төв театрын гоцлол бүжигчин Миса Куранага, Оделэ-Хар санаат шидтэний охин Хар хунд АНУ-ын Бостон балет компанийн гоцлол бүжигчин Уитнье Женьсон, Родбард буюу хар  санаат шидтэнд АНУ-ын АВТ театрын гоцлол бүжигчин, АНУ-ын Хюстон Балет театрын хүндэт жүжигчин, Колумбын иргэн Карлос Молино, Хан хүүгийн найзын дүрд  Cincinnati  балетын гоцлол бүжигчин, Кубын иргэн Родриго Алмаре, Алиа салбадайн дүрд АНУ, Вашингтон DC балетын гоцлол бүжигчин, Өмнөд Африкийн Бүгд Найрамдах улсын иргэн Андиле Длову, Зигфридын найзын дүрийг АНУ-ын Бостон балет компанийн гоцлол бүжигчин, Японы иргэн Рэе Ичикава нар тус тус бүтээх юм байна. Харин “Night Of Ballet” фестивалийн хоёр дахь хэсэг болох Гала тоглолт 6-р сарын 24-25-ны өдрүүдэд ДБЭТ-д тоглогдоно. Гала тоглолтонд 10 гаруй орны шилдгүүд оролцох ажээ.

 Монголчууд  Монгол, АНУ, Канад, Япон, Куба, Колумби, Англи гээд олон орны шилдэгүүдийн тоглолтыг харьцангуй хямд үнээр эх орондоо үзэх боломжтой болж байна.

 Оролцох бүжигчид, тоглолтын бүрэлдэхүүнээс харахад фестивалийн зохион байгуулалт, цар хүрээ нь нэлээд өндөр хэмжээнд хийгдэхээр төлөвлөгдсөний дээр эх орныхоо сонгодог урлагийг олон улсад сурталчлах, Монголчууддаа олон улсын сонгодог урлагийн хөгжлийг танилцуулах гэж буй энэхүү фестивалийн Ерөнхий ивээн тэтгэгчээр “Алтжин” ХХК,  хамтран зохион байгуулагчаар НЗДТГ, БСШУЯ, ДБЭТ, “Төгөлдөр” сан,  “Таван богд” ХХК гэх мэт байгууллагууд оролцож байгаа юм байна.

Мөн сонирхуулахад сонгодог бүжгээр амжилттай хичээллэж, суралцаж байгаа ирээдүйн балетчиддаа дэмжиж, тэдэнд урам өгөх зорилгоор Монголынхоо балетчин хүүхдүүдээс шалгаруулан авч, тоглолтонд оролцуулж, олон улсын балетчидтай нэг тайзан дээр гарах алтан боломжийг олгож байгаа юм. Монголчууд бидэнд эх орныхоо шилдэг бүжигчнийг олон улсын шилдэг балетчидтай хамт, тэдний гайхамшигт тоглолтыг эх орондоо үзэх гайхалтай өдрийг хүлээх үлдлээ.

  Б.Эрдэнэ.

Zindaa.mn-Үндэсний чөлөөт мэдээллийн портал