...Хүрэнхэн тэргүүнд нь хүрээд үзвэл, Хүүгийн минь зулай шиг бүлээхэн байлаа ...

Zindaa.mn-Үндэсний чөлөөт мэдээллийн портал өнгөрсөн  долоо хоногт туульсын нэгэн оргил Санжийн Пүрэвийн уран бүтээлийг уншигч танд өргөн барьсан билээ. Энэ долоо хоногт уншигч таныг  дэлхийн дэвжээнд хүрсэн Монголын сонгодог найрагч Б.Явуухулангийн ертөнцөөр аялахыг урьж байна. 

Хүлэг минь, шүлэг минь

Чи бид хоёрт дэлхийн дэвжээ хэрэгтэй                                                     Б.Явуухулан

Вансэмбэрүү 

Аглагхан ойн зах сийрээд

Орой нь халзрах уулын тагт

Ариухан  горхины эх шургаад

Авиа нь тасрах асганы   шилд

Төөлөөд  үзвэл бие чацуу

Тоолоод үзвэл нас чацуу

Үзэсгэлэнт хоёр вансэмбэрүү

Үүд хоймрын зайтай ургажээ

Үр тоосоо хүртдэг хирнээ

Үдшийн бүрийгээр бараагаа алдаж

Үүд хоймрын зайтай хирнээ

Үүрийн туяанаар биесээ үзэж

Илбийн юм шиг хосгүй  сонин

Ихэр ботго шиг хорвоод ховор

Сэрүүн Хангайн хоёр цэцэг

Сэтгэл бахдам гоёмсог ургажээ

Торомгор хөөрхөн хоёр ботго

Тоглож нэгийгээ хөвж явах шиг

Тоорцог өмссөн хоёр хүүхэд

Тойрон бүжиг хийж байх шиг

Үзэх бүрий өөр үзэгдэж

Үүлгүй тэнгэр дээр нь цэлийх юм.

Харах бүрий сонин харагдаж

Хавь орчим нь нам гүм байх юм

Дэгдэж ирсэн хээрийн салхи ч

Дэргэд нь ирээд намддаг болов уу

Хангайн дэгжин буга согоо ч

Хажууд нь гайхан зогсдог болов  уу?

Уранхан цоморлигий нь илээд үзвэл

Унаганы уруул шиг зөөлхөн байлаа

Хүрэнхэн тэргүүнд нь хүрээд үзвэл

Хүүгийн минь зулай шиг бүлээхэн байлаа

Өвөг дээдэс минь энэ цэцгийг

Өнө эртэд олсон гэнэм

Алжаасан бие эдгээдэг чадлыг   нь

Аль хэвээнээс мэдсэн гэнэм

Тийм ч учраас вансэмбэрүүг

Тэнгэрийн цэцэг гэж нэрлэсэн гэнэм

Ахар бодолтон сүйтгэчих вий гэж

Айлгах домог зохиосон гэнэм

Үүлэн нүүдэл өехийгөө зүсдэг

Үзүүрт модон ургаагүй хярд

Зуны бороо мөндрөөрөө унадаг

Зуурам хөлдүү хангайн царманд

Хосоор ургадаг  вансэмбэрүүг

Хайж олоход хэцүү юмаа

Хайж олоод үзвэл гэмээ   нь

Хорвоогийн нэгэн гайхамшиг юмаа

Zindaa.mn-Үндэсний чөлөөт мэдээллийн портал