Аймгуудын Сувиллын газрыг иргэдийг тусгаарлахад зориулж бэлтгэнэ

Улсын Онцгой комисс өнөөдөр /2020.02.24/ шуурхай хуралдаж, 2020 оны гуравдугаар сарын 2-ныг хүртэл БНСУ-ын Инчён болон Бусанаас Улаанбаатар чиглэлийн бүх нислэгийг цуцлах шийдвэр гаргасан.

Онцгой комиссын хуралдааны үеэр Эрүүл мэндийн сайд Д.Сарангэрэл нэгэн шинэ мэдээлэл өгсөн нь өчигдөр БНСУ-аас ирсэн иргэдийн тухай байлаа.

Эрүүл мэндийн сайд Д.САРАНГЭРЭЛ:

-Улсын Онцгой комиссын өнгөрсөн хурлаас Онцгой байдлын ерөнхий газрын харьяа Сургалтын төвийг тусгаарлах шаардлагатай хүмүүст зориулж бэлтгэсэн байгаа. Өчигдөр Улаанбаатарт ирсэн Дэгү хотод сурдаг болон амьдардаг 17 хүнийг Жаргалантын аманд байдаг Сургалтын төвд тусгаарласан.

Түүнээс гадна БНСУ-аас ирсэн дөрвөн гэлэнмаа, хоёр хүүхдийг өчигдөр орой ХӨСҮТ-д тусгаарласан. Тэдгээр хүмүүст ХӨСҮТ-ийн эмч, ажилтнууд хамгаалалтын болон эмнэлгийн зориулалтын хувцас хэрэглэлээ сайтар бэлтгэж, үзлэг, шинжилгээ хийсэн. Мөн албан ёсны орчуулагчаар дамжуулан мэдээлэл авсан. Дөрвөн гэлэнмаагийн хоёр нь болон хоёр хүүхэд нэг гэр бүлийн хүмүүс, нөгөө хоёр гэлэнмаа нь Монголд байнга оршин суудаг хүмүүс байсан. Тэдгээр хүмүүс Дэгү хотын "Шин Чон Жи" сүм буюу халдвар тархсан сүмд хамааралгүй болохыг тогтоосон.

Улсын Онцгой комиссоос өнөөдөр Аймаг, нийслэлийн Засаг дарга нарт нийт сувиллын газруудыг тусгаарлахад зориулж бэлтгэхийг үүрэг болгож, шинэ шийдвэр гаргалаа.

Түүнээс гадна Эрүүл мэндийн сайд Д.Сарангэрэл "Гадаад харилцааны яам, Эрүүл мэндийн яам БНСУ дахь монголчуудад анхаарлаа хандуулж ажиллана. Урьдчилан сэргийлэх чиглэлээр онцгойлон анхаарч байна. Гадаад харилцааны яамны дипломат ажилтнууд уртасгасан цагаар ажиллаж байна. БНСУ дахь Элчин сайдын яам болон онгоцны буудал дээр Консулын ажилтнууд ажиллаж, иргэдэд мэдээлэл, сэрэмжлүүлэг хүргэж байгаа. БНСУ-ын төр засагтай харилцаа холбоотой ажиллаж байгаа" гэсэн мэдээлэл өгсөн бол Гадаад харилцааны яам сайд Д.Цогтбаатар "Гадаад харилцааны яамнаас БНСУ дахь монгол иргэдэд анхаарал хандуулж, эрх ашгийг нь хамгаалах чиглэлээр ажиллаж байна. БНСУ дахь монголчууд эмнэлэгийн тусламж авахад ямар нэгэн эмнэлгийн төлбөр авахгүй гэдгийг БНСУ мэдэгдсэн. БНСУ-ын визний асуудалтай холбогдуулан Дэгү хотоос ирж байгаа иргэдэд болон зорчих иргэдэд түр хугацаанд виз олгохгүй. БНСУ-д байгаа визний зөрчилтэй иргэдийг ойлгож ажиллах зохицуулалт хийсэн, мөн гэрээт ажилчдын хугацааг 50 хүртэлх хоногоор сунгасан" гэлээ.