Гэмтлийн эмч нар эмнэлзүйн сургалтын төвтэй боллоо

Эрүүл мэндийн салбарт анх удаа Гэмтэл согог судлалын үндэсний төв  өөрсдийн дотоод нөөц бололцоогоо ашиглан мэс засал, сувилахуйн дуураймал эмнэлзүйн сургалтын (Clinical simulation center) орчинг бүрдүүлсэн эмнэлзүйн сургалтын төвийг байгууллаа. Ингэснээр эмч, мэргэжилтнүүд дуураймал орчинд хиймэл загвар дээр сургалт дадлагыг хийх боломжтой боллоо.

Тус төв нь гэмтэл согог заслын үндсэн мэргэшил болон төрөлжсөн, сувилахуй гэсэн чиглэлүүдээр сургалт явуулахаас гадна ажлын байран дах тасралтгүй  багц цагийн хурал, семинар, гадаад дотоодын төслийн сургалтыг амжилттай зохион байгуулж байна. Сүүлийн 10 жилд үндсэн мэргэшлийн сургалтад 213 эмч хамрагдаж, 25-30 нарийн мэргэшлийн эмч бэлтгэжээ.

Энэ үеэр Эрүүл мэндийн сайд Д.Сарангэрэл, Төрийн нарийн бичгийн дарга Я.Амаржаргал болон бусад албаныхан эрүүл мэндийн сайдын багцаас хийгдэж буй бүтээн байгуулалтын ажлуудтай танилцлаа. Тус төвийн үйлчлүүлэгчид зорчигдог байсан лифт өмнө нь маш жижиг, тэргэнцэртэй хүн ороход түвэгтэй байсныг өөрчилж, өргөн том хаалгатай болгосон нь үйлчлүүлэгчид ам сайтай байв. Мөн энэ онд ашиглалтад орох нэгдсэн ариутгал халдваргүйтгэлийн тасгийн их засварын ажлын ид өрнөж байлаа.