ОЛОН ӨНГӨ: Ягаан сандал

Гурван ч удаа нэгэн бүсгүйтэй нэг газар таарав. Тэр бүсгүй өөрийнхөө суух ёстой сандлаа мэддэг. Цүдгэр гэдсээ хүмүүсээс хамгаалан, өндгөө дарах шувуу шиг л нугдайн суудаг. Олны хөлөөс, болгоомжгүй нэгнээс, автобусны хүчтэй тоормосноос бүсгүйг ягаан сандал л авардаг. Гэвч тэр сандал нийтийн тээврийн автобусанд  хоёрхон байдаг нь харамсалтай.

Аз таарч суудал олдвол давхар биетэй эмэгтэйчүүд өөрийн тэмдэгт сандал дээрээ олзуурхан сууна. Олдохгүй бол бондойгоод л, гүрийгээд л зогсоод байхаас өөр аргагүй. Замын түгжрэлийн уртыг хэлэх үү, хэдэн ч минут, хэдэн ч цаг чилтэл зогсоож мэднэ. Хөөрхий, хэвлийдээ амьдрал тээж яваа бүсгүйчүүд маань ажилдаа ядраад түгжрэлд эвтэйхэн тухлаад амарч суухыг эрмэлзэнэ.

Хүмүүсийн зарим нь найр тавин суудлаа өгч байхад зарим нь харсан ч хараагүй юм шиг л нүүр буруулдаг. Давхар биетэй байхад хөл хавагнаад, нуруу чилээд, нойр  хүрээд мөн ч их ядардаг даа. Сүүлийн үед төрөлт нэмэгдсэнтэй холбогдуулж нийтийн тээврийн автобусны ягаан сандлыг нэммээр санагдлаа. Тэгвэл бага сартай жирэмсэн эмэгтэйчүүд ч хүнээс сандал царайчлахгүй ягаахан сандал дээрээ тухтайхан явах боломжтой болно. Манай хөгшчүүд их “дээрэлхүү”, залуусыг суудлаас нь хөөгөөд л босгож байгаа харагддаг юм.

Эхний 3- 4 сардаа ураг зулбах, амьгүй болох өндөр эрсдэлтэй байдаг тул хоёр зураастай учирсан л бол та хорьтой ч байсан хамаагүй, ягаан сандал дээрээ яаж ч байсан гүрийгээд л суугаад байдаг юм шүү.