Элсэлтийн ерөнхий шалгалт амжилттай дууслаа

Элсэлтийн ерөнхий шалгалтад нийт 39043 шалгуулагч бүртгүүлж энэ сарын 17, 18, 19-ний өдөр шалгалтын ажиллагаа амжилттай болж өндөрлөлөө. Улсын хэмжээнд нийт 47 шалгалтын байр ажиллав. Шалгуулагчдын зүгээс ямар нэгэн гомдол чирэгдэл, цагаас хоцрох, шалгалтын дүрэм, журам зөрчсөн үйлдэл гараагүй. Харьцангуй шалгуулагчид шалгалт өгч аль хэдийнэ сурсан нь ажиглагдлаа хэмээн Боловсролын үнэлгээний төвийн мэргэжилтнүүд ярьж байна.

Энэ сарын 17-нд хими, англи хэлний шалгалтаар эхэлсэн бол хоёр дахь өдөр нь монголын түүх, математик, биологийн шалгалтаар үргэлжлэв. 19-нд физик, монгол хэл, орос хэл, нийгмийн тухай мэдлэгээ шалгууллаа. Нийгмийн тухай мэдлэгийн шалгалт 19-нд 18 цаг 20 минутад дуусч энэ жилийн элсэлтийн ерөнхий шалгалт эцэслэсэн ажээ.

Элсэлтийн ерөнхий шалгалтын дүн оноо жагсаалтыг ирэх сарын 1-ний өдрийн 09.00 цагт www.eec.mn цахим хуудсанд байрлуулах аж. Шалгуулагчдын батламж картыг долдугаар сарын 1-5-ны хооронд “Соёмбо” дээд сургуулийн байранд тараах юм байна.

Эх сурвалж: МОНЦАМЭ