Төл малын хорогдол бага байх төлөвтэй байна

Төл мал хүлээн авалтын тоог гуравдугаар сарын 15-наас ХХААХҮЯ нэгтгэн зохион байгуулна. Өнгөрсөн жил мал тарга хүч сайн авсан учраас зүй бус хорогдол бага байх төлөвтэй байна.

Төллөх мал тарга хүчтэй байгаа учраас энэ жил олон төл хүлээн авах боломжтой гэдгийг ХХААХҮЯ-ны Мал аж ахуйн бодлогын хэрэгжилтийг зохицуулах газрын дарга Д.Батмөнх хэллээ.

Малын тарга хүч сайн байгаа нь сүүлийн хэдэн жил тохиолдож байгаагүй сайн мэдээ гэлээ. Учир нь сүүлийн гурван жил нийт нутгийн хэмжээнд ган, зудтай, өвөлдөө их цас орсон, зарим үед бага цас орсон учраас нэг, хоёрдугаар сарын үед мал усаар дутагдах зэрэг ихээхэн хүндрэлтэй асуудлууд тулгарч байсан. Энэ жилийн тухайд бэлтгэсэн өвс тэжээлийнхээ ихэнх нөөцийг хоёр, гурав, дөрөвдүгээр сардаа хэрэглэх боломжтой байна.

Улсын хэмжээнд малчид бэлтгэсэн өвс, тэжээлийнхээ 50 орчим хувийг зарцуулжээ. Аймаг, сум, дүүргийн хэмжээнд бэлтгэсэн өвс, тэжээлийн нөөц 76-аас дээш хувийн үлдэгдэлтэй байгаа аж. Өвсний үнэ газар зүйн байрлалаас хамаараад өнөөдрийн байдлаар 2,000-5,000 төгрөг, ногоон тэжээл 6,000 төгрөг, хорголжин тэжээл 735 мянга буюу нэг шуудай нь 29,500 төгрөг, хивэг нэг тонн нь 630 мянга буюу 16,500 төгрөгийн үнэтэй байна.

Түүнчлэн байгаль, цаг агаарын мэдээллээс харахад цасны зузаан нийт нутаг дэвсгэрийн хэмжээнд нэмэгджээ. Тухайлбал, өнөөдрийн байдлаар Говь-Алтайн зүүн тал, Баянхонгорын өмнөд хэсэг, Дундговь, Архангай талдаа цас багатай, бусад аймгийн хэмжээнд цасан бүрхүүл 1-25 сантиметр зузаан байна. Хэнтийд малын ундны цас хангалттай байна. Цас багатай аймгуудад ус хангамжийн байдал хүндрэх төлөвтэй байсан. Харин энэ сарын 18-ны өдрийн цасны мэдээллээс харахад харьцангуй боломжийн хаваржих нөхцөл бүрджээ.

Аймгууд ус хангамжийн тухайд тодорхой саналуудыг хэлж байна. Тухайлбал, Сүхбаатар аймаг нийт бэлчээрийн 50 орчим хувийг усжуулсан. Цас багатай үед ус хангамжийн асуудал хүндрэх төлөвтэй, 2021 оны байдлаар нэг худгаас 3.000-5.000 толгой мал услах боломжтой.