“Франц хэлтэн орнуудын хотхон” үзэсгэлэн яармаг боллоо

“Францын соёлын өдрүүд” болон “Дэлхийн театрын өдрүүд”-ийг тохиолдуулан Улаанбаатар дахь Аллианс Франсез төв Монгол Улс дахь Францын төлөөлөгчийн газар, Нийслэлийн Аялал жуулчлалын газартай хамтран гуравдугаар сарын 27-нд “Франц хэлтэн орнуудын хотхон” үзэсгэлэн яармагийг Сүхбаатарын талбайд зохион байгууллаа.

Тус арга хэмжээнд сургалт судалгааны байгууллага, аялал жуулчлалын компани, ресторан, төрийн бус байгууллага, франц хэлтэн орнуудын дипломатын төлөөлөгчийн газар зэрэг 40 гаруй байгууллага оролцов. Түүнчлэн Монгол дахь франц хэл, соёл сонирхогч, суралцагчдад франц хэлээр харилцах таатай боломжийг бий болгох зорилготойгоор оролцогч байгууллагуудын үйл ажиллагааг олон нийтэд таниулан сурталчилсан юм. Мөн франц хэлтэн орнуудын хүнсний бүтээгдэхүүн амталгаа болон олон нийтэд нээлттэй “Шөлний тэмцээн” боллоо.

Арга хэмжээний үеэр Нийслэлийн Аялал жуулчлалын газрын Бодлогын хэрэгжилтийн хэлтсийн дарга В.Батчимэг “Цаашид олон улсын соёлын өдрүүдийг тогтмол зохион байгуулахаар төлөвлөж байна. Нийслэлийн Засаг дарга нийслэлд зохион байгуулах урлаг, соёл, спорт, аялал жуулчлалын арга хэмжээнүүдийг баталсан. Энэ жил 36 арга хэмжээ зохион байгуулах төлөвлөгөөтэй байна” гэлээ.

Монгол-Францын төвийн захирал Сэлин Мартин Монголын франц хэлтэй иргэд цуглаж, соёлыг түгээж байгаагаараа тус арга хэмжээ онцлог болж байна хэмээн сэтгэгдлээ илэрхийлж байв.

Өдөрлөгийн үеэр УДБЭТ-ын тайзнаа тоглогдсон “Кармен” дуурийг Улаанбаатар хотын томоохон дэлгэцээр шууд дамжуулж олон нийтэд толилуулсан юм.

Эх сурвалж: Нийслэлийн сургалт, судалгаа, олон нийттэй харилцах газар