Н.Тавинбэх: Цахилгаан, дулааны үнийг 28 хувиар нэмэх шаардлагатай

Үүний дараагаар тэрээр сэтгүүлчдийн асуултад хариулт өгсөн юм.

-Эрдэнэбүрэнгийн усан цахилгаан станцыг эсэргүүцсэн орон нутгийн удирдлагууд нь Хятад руу бичиг явуулсан асуудал гарсан. Энэ юу болсон бэ?

-Эрдэнэбүрэнгийн усан цахилгаан станц бол өсөн нэмэгдэж байгаа хэрэгцээг хангах, ногоон эрчим хүч, технологийн горимын тохируулгыг хийх чадамжтай эх үүсвэр. Тийм учраас энэ эх үүсвэрийг заавал барих ёстой. Баруун бүсийн эрчим хүчний хэрэглээг импортоор авч хангаж байгаа хараат байдлаасаа гарах ёстой. Байгалийн асар их нөөц боломж байгаа. Олон жил үргэлжилж байж өнөөдөр барилга угсралтын ажил явагдах хэмжээнд хүрсэн. Олон улс усны нөөцөө ашиглан эрчим хүчний хэрэгцээгээ хангаж байгаа. Бид ч тэгэх ёстой.

Харин нөлөөлөлд автсан иргэдийн төлөөлөл гомдол гаргаж байгаа. Иргэдийг бол ойлгож байна. Бэлчээрийн даац хэтэрсэн, газрын гарц муудсан энэ цаг үед малчид маань нүүдэл суудал хийх, шинээр өвөлжөө хаваржаа барих амаргүй байж таарна. Тиймээс иргэдтэйгээ ойлголцож, зөвшилцөж байж энэ төслийг хэрэгжүүлнэ. Олгох нөхөн олговор маань шинэ газар очоод шинэ газар очоод ажил, амьдралаа эхлүүлчих санхүүгийн дэмжлэг болж чадна гэж найдаж байгаа.

-Ойролцоогоор хэд орчим төгрөгийг нэг өрхөд өгөх вэ?

-Бид тооцоо, судалгаа хийчихсэн байгаа. Засгийн газраас албан ёсны шийдвэр гараагүй учраас мөнгөн дүн хэлэх боломжгүй байна.

-Тавантолгойн дулааны цахилгааны станцын тендерийн ялагчийг хэзээ зарлах вэ?

-Дөрөвдүгээр сарын нэгэнд энэ тендерийг нээнэ. Тендерийн материалыг худалдаж авсан БНХАУ-ын тав, ОХУ-ын нэг компани байгаа. Нээлт хийнэ гэдэг нь гүйцэтгэгч шалгарчихсан гэсэн үг биш. Маш том ажил учраас үнэлгээний ажил нэлээд удаан үргэлжлэх байх гэж бодож байна.

-Цахилгаан, дулааны үнэ өсөх байдал гарч байна. Үнийн өсөлтийг иргэдэд ачаалал болгохгүйгээр төсвөөс татаас хэлбэрээр шийддэггүй юм уу?

-Өнөөдрийг хүртэл Монгол Улсын төсвөөс эрчим хүчний салбарын санхүүгийн алдагдлыг хаах зорилгоор татаас огт өгч байгаагүй. Засгийн газар өөрөө гаргасан хөнгөлөлтүүдтэйгээ холбоотой татаасуудыг л олгож байгаа. Ер нь одоо байгаа цахилгаан, дулааны хэрэглэгчийг үнийг дор хаяж 28 хувиар нэмэх шаардлагатай тооцоо, судалгаа гарсан. Өнөөдөр маш хүнд байна. Үнийг нэмэхгүй бол эрчим хүчний салбар хэвийн үйл ажиллагаагаа явуулах санхүүгийн боломжгүй болж байгаа.  

-Гэр хорооллын айл өрхүүдийн шөнийн цахилгааны төлбөрийг тэглэсэн. Үүнээс шалтгаалан үүссэн алдагдал, өр төлбөрийг барагдуулж байгаа юу?

-Засгийн газрын үйл ажиллагааны хөтөлбөрт тусгагдсан агаарын чанарын бүсэд хамрагдсан нийслэлийн гэр хорооллын айл өрхийн шөнө хэрэглэсэн цахилгаан, эрчим хүчний үнийг төрөөс хариуцаж байгаа. Шөнийн хэрэглэсэн эрчим хүчний төлбөрийн хэмжээ жилээс жилд нэмэгдэж байна. Өөрөөр хэлбэл олон айл халаалтаа цахилгаанаар шийдэж байгаатай холбоотой. Төсвийн төлөвлөгөөнд тусгагдсан хэмжээнээс гүйцэтгэл давж байгаагаас болоод тодорхой хэмжээний өр авлага үүсч байгаа нь үнэн. Гэхдээ үүнийг дараагийн жилийн төсөвт суулгаад барагдуулаад явж байгаа. Тийм болохоор өнөөдрийн байдлаар онцын хүндрэл байхгүй. 

-Дөрөвдүгээр цахилгаан станцын Гүйцэтгэх захирал Ү.Төмөрхуяг ажлын байрандаа архидан согтуурсан гэсэн мэдээлэл байгаа. Энэ хүнд ямар нэгэн байдлаар хариуцлага тооцох уу?

-Дулааны дөрөвдүгээр цахилгаан станцын захиралтай холбоотой гомдол яаманд ирсэн. Ажилтан, ажил олгогчийн хооронд гарсан маргааныг зохицуулдаг эрх зүйн зохицуулалт бий. Тийм учраас бид шүүхэд хандахыг хүссэн. Технологийн тасралтгүй үйл ажиллагаатай, стратегийн ач холбогдолтой үйлдвэр учраас ямар нэгэн маргаан үйл ажиллагаанд нөлөөлж болохгүй. Тийм ч учраас Ажлын хэсэг гарган шалгаж байгаа. Хууль хяналтын байгууллагын шалгалтаар зөв бурууг эцэслэн тогтоосны дараа хариуцлага тооцох асуудал яригдана.

-Тус үйлдвэрийн ажилтан амь насаа алдсан харамсалтай хэрэг гарч байсан. Энэ талаар удирдлагууд мэдсэн үү. Нуун дарагдуулахыг оролдсон гэдэг нь үнэн үү?

-Дөрөвдүгээр станц дээр хүний амь нас эрсэдсэн үйлдвэрлэлийн осол гарсан нь үнэн. Үйлдвэрлэлийн ослыг нуусан, нуун дарагдуулахыг оролдсон зүйл байхгүй. Цагдаагийн байгууллага шалгаж байгаа. Ээлжинд гарч байсан ажилтан үзлэг хийж байхдаа гэмтсэн тоноглолыг засах гэж байхдаа хүчдэлд нэрвэгдэж амь насаа алдсан. Мэргэжлийн байгууллагуудын шалгалтын дүн эцэслэн гарсны дараа хариуцлага тооцох асуудал яригдана. 

Т.ХӨВСГӨЛ

Эх сурвалж: ӨГЛӨӨНИЙ СОНИН