Үнэ тогтворжуулах хуультай зэрэгцэн ТҮЛШНИЙ ҮНЭ өслөө

Цахим орчинд шатахууны үнэ 200-250 төгрөгөөр өссөн гэх мэдээлэл тархаад байна.

Олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, нөлөөллийг бууруулах тухай хуулийн төслийг батлаад долоо хоног ч өнгөрөөгүй байгаа билээ. Гэтэл шатахууны үнэ өссөн нь холбогдох яам, байгууллага хийгээд баталсан хуулийн төсөлд иргэдийн эргэлзээг төрүүлж байгаа юм. Тэгвэл цахим орчинд тархаад буй мэдээллийн мөрөөр шатахуун түгээх станцуудад шатахуун, түлшний үнэ нэмэгдсэн эсэх талаар судаллаа.

Шатахуун түгээх станцуудад АИ-92 шатахууныг литр тутамд 2385-2390 төгрөгөөр борлуулж байна. Энэ нь АИ-92 шатахууны үнэд өөрчлөлт ороогүй гэсэн үг юм. Харин АИ-95 шатахууны үнэ литр тутам нь энэ сарын 13-ны өдрийн байдлаар 2990-3070 төгрөгийн хооронд хэлбэлзэж байсан билээ.

Тэгвэл бодит байдалд Шунхлай, Петровис, Сод монгол шатахуун түгээх станцуудаар литр тутмыг нь 3260 төгрөгөөр борлуулж байна. Энэ нь өнгөрсөн долоо хоногтой харьцуулахад 190-270 төгрөгөөр өссөн ханш юм. Харин түлшний дундаж үнэ өнгөрсөн долоо хоногийн байдлаар литр тутам нь 3130-3135 төгрөгийн ханштай байсан юм.

Түлшийг шатахуун түгээх станцууд өчигдрийн байдлаар 3380 төгрөгөөр борлуулж байлаа. Ингээд үзвэл, долоо хоногийн хугацаанд түлшний дундаж үнэ 245-250 төгрөгөөр өсжээ.

Холбогдох яамны зүгээс АИ-92 шатахууны үнэ хэвийн байгаа гэдгийг тодотгож, харин АИ-95 шатахуун болон түлшний үнэ нэмэгдэж байгааг мэдээлсэн юм.

Шатахууны үнэ нэмэгдсэн мэдээллийн дагуу шатахуун түгээх станцуудаас тодруулахыг оролдсон ч ажлын цаг дууссан учраас мэдээлэл өгөх боломжгүй гэх тайлбарыг өглөө.

Олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, нөлөөллийг бууруулах тухай хуулийн төслийг эцэслэн баталсан ч ийнхүү шатахуун, түлшний өссөн байна.

Эх сурвалж: ӨГЛӨӨНИЙ СОНИН