Хүнсний ногооны үрийг 80 хувийн хөнгөлөлттэй олгож эхэллээ

Хүнс, Хөдөө Аж Ахуй Хөнгөн Үйлдвэрийн Яамнаас "Хүнсний ногоо" хөтөлбөрийн хүрээнд 2022 оны улсын төсвийн хөрөнгөөр хүнсний ногооны задгай талбайн болон хүлэмжийн 11 нэр төрлийн 11,935 килограмм, 4,711,935 ширхэг үрийг тус тус худалдан авчээ. 

Засгийн газрын 2022 оны 118 дугаар тогтоолоор улсын төсвийн хөрөнгөөр нийлүүлсэн хүнсний ногооны үрийн үнийг 80 хувь хөнгөлөн олгохоор шийдвэрлэсний дагуу 21 аймаг, нийслэлийн хөдөө аж ахуйн газруудад байцаа, шар лууван, шар манжин, хүрэн манжин, тарвас, бууцай, сармис, урт сонгино, хүлэмжийн хэмх, лооль, чинжүүний үрийг тус тус  хуваарилан хүлээлгэн өгсөн бөгөөд хүнсний ногооны үрийг иргэдэд олгох ажил нийслэл, сум, аймагт явагдаж байгаа аж. 

Хүнсний ногооны үрийн дэмжлэгт хамрагдах хүсэлтэй иргэн, аж ахуйн нэгжүүд өөрийн харьяа аймаг, нийслэлийн Хүнс, хөдөө аж ахуйн газарт хандахыг ХХААХҮЯ-наас мэдээллээ.