Ой, хээрийн түймрээс урьдчилан сэргийлье

Ус, цаг уур орчны шинжилгээний газраас ирүүлсэн мэдээллээр 4 дүгээр сарын байдлаар Булган, Сэлэнгэ, Хэнтий, Сүхбаатар зэрэг аймгуудад түймрийн нэн аюултай,  Дорнод, Төв, Хөвсгөл аймгийн Тариалан, Рашаант сум, Архангай аймгийн Түвшрүүлэх, Эрдэнэмандал, Өвөрхангай аймгийн Хархорин, Хужирт зэрэг сумдын нутгаар түймрийн эрсдэл их буюу аюултай түвшинд, Завхан, Увс аймагт түймрийн аюул дунд зэрэг байна.

Иймд:

Иймд иргэн та бүхэн асаасан гал, шүдэнз, татсан тамхины гал, цог, нурмыг бүрэн унтраах, халуун үнс, нурмыг тусгайлан бэлдсэн таглаа бүхий нүх, саванд хийх, айл өрхүүд хашааны өнжмөл өвсийг шатаахгүй байх, гэр сууц, хашаа хорооны гадуур түймрээс хамгаалах зурвас татах, гал унтраах багаж хэрэгслийг бэлтгэх зэргээр ой, хээрийн түймрээс урьдчилан сэргийлэх арга хэмжээ авахыг анхааруулж байна. 

“Түймрийн аюултай үе” гэж тухайн нутаг дэвгэрт ой, хээрийн түймэр гарах байгалийн нөхцөл бүрдсэн хуурайшилт бүхий цаг хугацаа буюу жил бүрийн 3 дугаар сарын 20-ны өдрөөс 6 дугаар сарын 10-ны өдөр, 9 дүгээр сарын 20-ны өдрөөс 11 дүгээр сарын 10-ны өдөр хүртэлх хугацааг хэлнэ.

Эх сурвалж: Онцгой байдлын ерөнхий газар