С.Энхболд: Зонхилж буй өвчлөлд тулгуурлаж 0-17 насны багцыг гаргасан

Эрүүл мэндийн сайд С.Энхболд Ерөнхий сайдын ажлын албаны дэргэдэх Иргэд, олон нийттэй харилцах 11-11 төвд өнөөдөр 14.00-17.00 цагийн хооронд ажиллаж байна.

Энэ үеэр тэрбээр иргэдийн дунд хийж буй эрт илрүүлэг, үзлэг оношилгооны талаар тайлбар хүргэлээ.

Ингэхдээ "Олон нийтийн сүлжээнд байгаа 0-17 насны хүүхдүүдэд 150 мянган төгрөгөөр шинжилгээ хийж байна гэх агуулга бүхий мэдээлэл гарч байна. Ийм зүйл байхгүй.

Бид 18-аас дээш насны дөрвөн багцад 60-150 мянган төгрөгийн шинжилгээ хийж байгаа. Харин 0-17 насны хүүхэд тухайн оршин суугаа дүүрэг болон аймгийнхаа эрүүл мэндийн анхан шатны байгууллагаар үйлчлүүлж байгаа. Энэ нь ямар ч үнэ төлбөргүй. 

Тухайлбал, 0-5 насны хүүхдэд дөрвөн төрлийн шинжилгээг хийж байна. Харин 6-17 насны хүүхдэд зургаан төрлийн шинжилгээг хийж байна. Эдгээр шинжилгээг манай улсад зонхилон тохиолдож байгаа өвчлөл дээр тулгуурлаж, багцалсан.

Тэгэхээр 0-15 насны хүүхдэд эхний ээлжинд амны хөндийн үзлэг, мөн биеийн хөгжлийн индекс, асуумжийн аргаар зан төрхийн өөрчлөлттэй эсэх шинжилгээг оруулсан" гэлээ.