Байден, Трасс нар хамтран Орос, Хятадыг эсэргүүцэхээр тохиролцов

АНУ-ын Ерөнхийлөгч Жо Байден болон Их Британийн Ерөнхий сайд Лиз Трасс нар хамтран Орос, Хятад, Ираныг эсэргүүцэхээ үргэлжлүүлэхээр тохиролцжээ.

Жо Байден Их Британийн Ерөнхий сайдтай утсаар ярихдаа Орос, Хятад, Ираны зүгээс ирж байгаа сорилт, аюул заналын талаар хэлэлцсэн байна.

Цагаан ордноос энэ талаар мэдээлээд “Ерөнхийлөгч Жо Байден, Ерөнхий сайд Лиз Трасс нар Украиныг дэмжих..., Хятадын бий болгосон сорилтуудыг шийдвэрлэх, Ираныг цөмийн зэвсэгтэй болохоос сэргийлэх, эрчим хүчний тогтвортой, хангалттай нөөцийг хангах зэрэг дэлхийн тулгамдсан асуудлуудын талаар нягт хамтын ажиллагаагаа үргэлжлүүлэхийн чухлыг хэлэлцлээ” гэжээ.

Үүнээс гадна тэд Их Британи болон АНУ-ын хоорондын онцгой харилцааг онцлон тэмдэглэсэн байна. Жо Байден, Лиз Трасс нар энэхүү харилцааг цаашид гүнзгийрүүлэхэд бэлэн байгаагаа илэрхийлжээ.

Түүнчлэн Трасс, Байден нар ярианыхаа явцад хоёр орны хамтын ажиллагааг, тэр дундаа батлан хамгаалах салбарт бэхжүүлэхээр тохиролцсон байна.