Бээжинд ковидын халдвар эрчимтэй тархаж байна

БНХАУ-ын нийслэл Бээжин хотод 24 цагт коронавирусний халдварын 1438 шинэ тохиолдол бүртгэгдсэн нь цар тахал эхэлснээс хойш бүртгэгдэж буй хамгийн өндөр үзүүлэлт болж байна гэж БНХАУ-ын Эрүүл ахуй, эрүүл мэндийн улсын хороо мэдээлжээ.

Эдгээр тохиолдлоос 274-т нь шинж тэмдэг илэрсэн бол 1164 хүнд шинж тэмдэг илрээгүй байна.

Пүрэв гарагаас /2022.11.24/ эхлэн Бээжингийн оршин суугчдад олон нийтийн газарт ороход нь сүүлийн 48 цагт ПСР-ийн шинжилгээний хариу нь сөрөг гарсан байх шаардлага тавихаар болжээ.

Бээжинд хөл хорио хараахан тогтоогоогүй байгаа ч 3.4 сая хүн амтай Чаоян дүүргийн оршин суугчдад онцын шаардлагагүй бол дүүргийн бүсээс гарахгүй байхыг зөвлөсөн байна. Учир нь тус дүүрэгт шинэ тохиолдлын ихэнх хувь нь бүртгэгджээ. Чаоян дүүрэгт олон тооны гаднын элчин сайдын яам, томоохон компаниудын оффис байрладаг байна.