Бээжинд ковидын хязгаарлалтыг эсэргүүцсэн жагсаал болов

БНХАУ-ын нийслэл Бээжин хотод өнгөрсөн ням гарагт /2022.11.27/ ковидын эсрэг хязгаарлалтыг эсэргүүцсэн хэдэн зуун хүний жагсаал болжээ.

Жагсагчид Лянма голын эрэгт цугларч, Шинюаннань, Шиньпун гудамжны уулзварт ирэхэд цагдаа нар Шинюаннань дүүргийг бүсэлж, автомашинаар хаалт тавьсан байна. Жагсагчид төрийн дууллаа дуулан, эрх чөлөө, ардчилал хэмээн хашхирч, ПСР шинжилгээ байнга өгөх шаардлагыг цуцлахыг шаардсан байна. Үүнээс гадна, Шанхай, Нанжин зэрэг хотуудад мөн эсэргүүцлийн жагсаал болжээ. 

Хятад улсад дөрвөн өдөр дараалан ковидын халдварын тохиолдлын тоо дээд үзүүлэлтэд хүрээд байна. Сүүлийн 24 цагт тус улсад ковид халдварын нийт 40052 тохиолдол бүртгэгдэж, нийт тохиолдлын тоо 307802-д хүрлээ. Ковидоос үүдэлтэй 5233 нас баралт бүртгэгдээд байна. Шинж тэмдэггүй тохиолдлын статистикийг тус улс хөтлөөгүй байна.