Өнөөдөр олон улсын хөгжлийн бэрхшээлтэй хүний эрхийн өдөр

НҮБ-ын Ерөнхий Ассамблейн 1992 оны 47/3 дугаар тогтоолоор жил бүрийн арванхоёрдугаар сарын 03-ны өдрийг “Олон улсын хөгжлийн бэрхшээлтэй хүний эрхийн өдөр” болгон тэмдэглэж байхаар тунхагласан.

Монгол Улсын хэмжээнд 11 мянга гаруй тусгай хэрэгцээт буюу бидний нэрлэж заншсанаар хөгжлийн бэрхшээлтэй хүүхэд байна. Тэдний 1156 нь цэцэрлэгт 7794 нь сургуульд суралцаж байна.

Үлдсэн хүүхдүүд нь биеийн байдлаас хамааран гэртээ аав ээжийнхээ асаргаанд байдаг. Боловсролын байгууллагад хамрагдаж байгаа хүүхдүүдийн 70 орчим хувь нь ердийн сургууль, цэцэрлэгт явдаг. Улсын хэмжээнд тусгай хэрэгцээт хүүхдэд боловсрол олгодог хоёр цэцэрлэг, зургаан сургууль бий.

Тусгай хэрэгцээт хүүхдүүдийн асуудлыг цогцоор нь авч үзэх, тэдэнд зориулсан эрүүл мэнд, нийгмийн хамгаалал, боловсролын үйлчилгээг нэг цэгт үзүүлдэг байх шийдлийн талаар аав ээж, асран хамгаалагчид, багш ажилчидтай байнга уулзаж, тэднийг сонсож байж бодлого зөв болно.

БОЛОВСРОЛ:

• Тусгай хэрэгцээт хүүхдүүд тусгай сургуульд 9 дүгээр анги хүртэл суралцдаг. Тэднийг үргэлжлүүлэн суралцах боломжоор хангах
• Цэцэрлэгт хамрагдах насыг уян хатан зохицуулах
• Сургууль, цэцэрлэгээс бусад төрлийн боловсрол, хөгжлийн байгууллагыг байгуулах, эцэг эхчүүдэд сонголт олгох
• Багш нарыг дахин сургах, чадавхжуулах
• Ердийн сургуулийн багш нарт ч хөгжлийн бэрхшээлтэй хүүхдүүдтэй ажиллах арга зүйд сургах
• Хүүхдийн сургууль дээр байх хугацааг сунгах
• Сэтгэл судлаачдыг ажиллуулах

ЭРҮҮЛ МЭНД:

• Эрт илрүүлэг, оношилгоог сайжруулах
• Хөдөлгөөн засалч, хэл засалч зэрэг мэргэжилтний хангалтыг нэмэгдүүлэх
• Сэтгэцийн эмгэг гэсэн ганцхан ангилал, ойлголтод бүх хүүхдийг хамруулахгүй байх
• Өрхийн болон бусад шатны эмч нарын мэдлэг, ур чадвар, хандлагыг сайжруулах

ХӨДӨЛМӨР, НИЙГМИЙН ХАМГААЛАЛ:

• Тусгай хэрэгцээт хүүхдүүдийг орчин үеийн чиг хандлагад нийцсэн ажил мэргэжил, ур чадвар эзэмшихэд дэмжлэг үзүүлэх
• Хүүхдээ харж байгаа эцэг эхийн нийгмийн баталгааг сайжруулах
• Барилга байгууламжийн хүртээмжтэй байдал, хөгжлийн бэрхшээлтэй иргэнд ээлтэй байдалд анхаарах

Гурван салбарын хамтын ажиллагааны хүрээнд тушаал, шийдвэр хангалттай гарсан боловч хэрэгжилт хангалтгүй. Ийм учраас яамд бодлогоо зангидах, уялдаатай байх талаар илүү үр дүнтэй ажлууд хийж, асуудлын араас нь биш бодлого нь нэг шугам дээр, асуудлын өмнө нь явж байх ёстой.