Неонацизмтай тэмцэх тухай тогтоолыг баталжээ

НҮБ-ын Ерөнхий Ассамблей Орос, Беларусь, Туркменистаны хамтран боловсруулж, санал хураалтад оруулсан “Арьс өнгөөр ялгаварлан гадуурхах, хавчих, өөр үзэл бодлыг үл тэвчих үзлийн орчин үеийн хэлбэрүүд даамжран газар авахад тус дөхөм үзүүлж буй нацизм, неонацизмыг баатарлаг үйлс мэтээр сурталчлахтай тэмцэх тухай” тогтоолыг олонхын саналаар баталсан байна.

Тогтоолыг 119 улс дэмжиж, 53 улс эсэргүүцэж, 10 улс түдгэлзсэн байна. Эсрэг санал өгсөн улсуудын дотор Герман, Итали, Канад, АНУ, Украин, Япон улс орсон аж. Харин дэмжсэн улсуудын тоонд Азербайжан, Алжир, Армен, Беларусь, Боливи, Бразил, Хятад, Куба, Серби зэрэг улс багтсан байна.

Уг тогтоолыг санаачлагчдын үзэж байгаагаар, энэ нь нацизм, арьс өнгөөр ялгаварлан гадуурхах болон өөр үзэл бодлыг үл тэвчих үзлийн эсрэг тэмцэлд олон улсын хамтын ажиллагааг бэхжүүлэхэд чиглэж байгаа бөгөөд нацизм болон түүний илрэлүүдийн эсрэг тэмцэл нь НҮБ-ын нэн чухал зорилтуудын нэг хэвээр байгаа ажээ.

74 заалт бүхий уг тогтоолд нацизмыг баатарлаг үйлс мэтээр сурталчилсан хэрэг явдлуудыг шийдвэртэй буруушааж, түүхэн үнэнийг хадгалан хамгаалах хүчин чармайлтуудыг сайшааж, хүмүүнлэг ёсны эсрэг гэмт хэргүүдийг үгүйсгэхээс сэрэмжлэх арга хэмжээ авах тухай зөвлөмж оруулсан байна.