Д.Мөнх-Эрдэнэ: Энэ бол амиа аврах гэж байгаа гэмт хэрэгтнүүдийн арчаагүй оролдлого

Шүгэл үлээгчийг хамгаалах тухай хуулийн төслийн талаар Хууль зүй, дотоод хэргийн дэд сайд Д.Мөнх-Эрдэнэ мэдээлэлэл өглөө.  Тэрбээр: Засгийн газрын өнөөдрийн хуралдаанаар Шүгэл үлээгчийг хамгаалах тухай хуулийн төслийг хэлэлцэж, дэмжиж, УИХ-ын чуулганд өргөн мэдүүлэхээр боллоо. Энэ бол анхдагч хуулийн төсөл. Өөрөөр хэлбэл Монголд анх удаа нийгэмд онцгой чухал ач холбогдолтой, нийтийн ашиг сонирхолтой холбоотой, авлига, албан тушаал, төсөв, татвартай холбоотой хэргүүдийн талаар шүгэл үлээсэн иргэн, хуулийн этгээдийг төрийн хамгаалалтад авах, дэмжиж урамшуулах зохицуулалтыг Монгол Улсад анх удаа бий болгох хуулийн төсөл юм.

Авлига, албан тушаалын гэмт хэрэгт өөрөө холбогдсон, шалгагдаж байгаа, энэ талаар маш ноцтой шийдвэрүүд гаргаж байсан, хууль хяналтын байгууллагаар шалгагдаж байгаа этгээдүүд хэрэг нь боогдоод, шалгагдаад, гарах гарцгүй болоод ирэхээрээ өөрийн холбогдсон хэргээс өөр тийш нь анхаарлыг сарниулах, энэ гэмт хэрэгтэй тэмцэж байгаа засгийн газар, тэр дундаа Хууль зүй, дотоод хэргийн яам, хууль хяналтын байгууллагыг удирдаж байгаа хүмүүсийг харлуулах, ард олныг төөрөгдүүлэх, үймүүлэх увайгүй үйлдлүүдийг гаргаж байгаа. Энэ бол шүгэл үлээгч биш. Энэ бол амиа аврах гэж байгаа гэмт хэрэгтнүүдийн арчаагүй оролдлого гэв.