Г.Ганхүү “Шударга ёс эвсэл”-ийг “Али Баба ба 40 дээрэмчин”-тэй зүйрлэжээ

  Иргэний зориг-Ногоон намын Ерөнхий нарийн бичгийн дарга Г.Ганхүүг “Шар айраг” хамтлагийн ахлагч гэдгээр нь хүмүүс сайн мэддэг. Тэрээр тус намаас 2000, 2008 оны сонгуульд нэр дэвшсэн хэдий ч өвдөг шороодсон удаатай. Энэ жилийн хувьд ИЗ-НН улс төрийн гурав дахь томоохон хүчин болж УИХ-ын сонгуульд оролцоно. Сонгуульд оролцож байгаа аль ч нам улс төрийн хүчин өрсөлдөгчдөө судалдгийн адилаар тус намын генсек Г.Ганхүү ч УИХ-ын сонгуульд аль нам давамгайлан оролцохыг хэдийнэ  дүгнэж амжжээ. Тэрээр “УИХ-ын энэ удаагийн сонгуульд ИЗ-НН, МАН, АН, МАХН-МҮАН-ын “Шударга ёс эвсэл” гэсэн дөрвөн нам давамгайлж орох юм шиг байна. ИЗНН-ыг цөөхөн, мөнгөгүй гэж харж магадгүй ч бид өнөөг хүртэл чиг шугамаа алдахгүй явсаар ирсэн. Эрх барьж байгаа МАН бол мөнгөтэй, улсын мөнгөөр байшин барьсан түүх намтартай нам. Ямар ч нам сайнтай муутай л байдаг байх. Гэхдээ энэ удаа МАН-ын рейтинг урьд өмнө байгаагүйгээр уначихсан байгаа. АН-ынх ч ялгаагүй. Өчигдөр миний сонссоноор бол АН-ынхан аль хэдийнэ ялалтаа байгуулчихсан, сайдуудаа хуваарилаад явж байна гэсэн. МАХН-МҮАН-ын эвслийг би хувьдаа “Али-Баба ба 40 дээрэмчин” юм болов уу гэж харж байна. Тэнд ард иргэдийн тархийг популизмаар угааж, хорслоо тайлж өшөө авах гэсэн хэдэн хүмүүс цугларчихсан мэт санагдаад байгаа юм” гэжээ.

Т.Ялгуун